Read KIMERU BIBLE PROTESTANT EDITION Zab 7 Bible Online

Zab 7 - KIMERU BIBLE PROTESTANT EDITION bible

Zab 7

¹MWATHANI Mûrungu waakwa, nî kîrî gwe ndiiciithaga; ntunyûkia kuuma kîrî barîa bonthe bagûncwaa, ûmbonokie;

²batîkeeje gûnkururia mbaga wa gûntunyûkia; nabo bantambûranga ta ngatûnyi.

³Gwe MWATHANI Mûrungu waakwa, nkëeja kwîthîrwa kûrî u nthithîtie; nkëethîrwa kûrî ûthûûku ndî nabu;

⁴nkëeja kwîthîrwa ndîrarîaa mûcoore waakwa wega na ûthûûku, kana nthithîria mûnthû waakwa ûthûûku gûtî na gîtûmi,

⁵reka anthû baakwa beengane naani mwanka bangwatagwate, bankinyangîre nthî mwanka nkue, bakinyangîre mwoyo jwaakwa tîîriine.

⁶Njû na mûthûûro MWATHANI njû ûrwee na anthû baakwa barîa ang'entu njû ûndûûngamîîre gwe Mûrungu waakwa, reka îtua rîaaku rîonekane.

⁷Ûthûrania antû bonthe bakûthiûrûkîre naagwe ûbaathage ûrî îgûrû.

⁸MWATHANI nîwe ûgiitagîra antû îgamba ntuîra gwe MWATHANI kûringana na waagîru bwaakwa, na nîûntû ndî ûûmeene.

⁹ Thiria ûthûûku bwa barîa baaî îndî barîa baagîru, ûtûme bathinyaare. Gwe nî wiijî mathûgaanio ja antû na ûkamenya ûrîa nkoro ciaao ikari, gwe Mûrungu wa mma.

¹⁰Rong'o yaakwa nî Mûrungu; we ûrîa wonokagia barîa baagîru.

¹¹Mûrungu agambanagîra na îota, we nî Mûrungu ûthwîre ûthûûku magiita jonthe.

¹²Ûrîa ûkarega kwirira, Mûrungu akaamûnoorera rûchiû. Mûrungu nî akûmîte ûta bwaawe na aakundîka rûrigi;

¹³nî agwete mathaga jaawe ja ndwaa, mîgwî yaawe ka îgwakana mwanki.

¹⁴Atîrî, muntû ûmûûî airiragîria ûthûûku, agakamata îu rîa waayia, rîakûra rîgaciara ûrongo.

¹⁵Eenjagîra muntû ûngî îrinya rîrîraaja, îndî nowe warûkaga îrinyeene rîrîa eenjîte wengwa.

¹⁶Acokagîrwa nî waayia bwaawe wengwa, ûthûûku bûrîa athithanagîria bûkamûcokera.

¹⁷Nî ngûkaatha MWATHANI nîûntû bwa waagîru bwaawe; ngaagûkumia na rwîmbo gwe MWATHANI Ûrîa Ûrî Îgûrû buru.