Read KIMERU BIBLE PROTESTANT EDITION Zab 71 Bible Online

Zab 71 - KIMERU BIBLE PROTESTANT EDITION bible

Zab 71

¹Gwe MWATHANI, nîgwe giiciitho gîaakwa; ûkororeka ncokerwa nî nthao.

²Ntunyûkia na ûmbonokie nîûntû ûrî ûmwagîru, nîûntû ûrî ûmwagîru, nkindîra gûtû gwaaku na ûmbonokie.

³Îtîkîra kwaa giitiiro gîaakwa, gîa kûmatûkagîra magiita jonthe. Mbonokagia ta ûrîa uugîîte; nîkwîthîrwa nîgwe giitiiro gîaakwa na kîmatûkîro gîaakwa.

⁴Itû Mûrungu waakwa, ntunyûkia kuuma kîrî barîa baaî; ûmbonokie kuuma kîrî ngîti na barîa batî kîaao.

⁵Nîkwîthîrwa gwe MWATHANI nîgwe wîrîgîîro bwaakwa; kuuma wîthî bwaakwa, nîgwe MWATHANI ntwîre mbîtîkîtie.

⁶Kuuma ndîgûciarwa, ntwîre nkwîrîgîîrîte; ngatûûra ngîgûkumagia magiita jonthe.

⁷Nî ntwîre ndî kîonereeria kîa ûtûûro bûbwega kîrî babaingî, Naagwe nîgwe giiciitho gîaakwa kîa inya.

⁸Ngûkumagia magiita jonthe; nkaathaga mwago jwaaku mûthenya junthe.

⁹Ûgantîîjîra ndaakûra; ndaaga inya itû ûkambîrûkîra.

¹⁰Anthû baakwa ka bagwîka nkireba; bakîendaga kûmbûraga.

¹¹Anthû bariuga atîrî, “Mûrungu nî amûtiganîrîtie; gatwîngane nawe tûmûgwate; nîkwîthîrwa atî na wa kûmûteethia.”

¹²Itû Mûrungu ûgakara kûraaja naani; îjanga ntûti ûnteethie itû Mûrungu waakwa.

¹³Thiria anthû baakwa bacokerwe nî nthoni barîa bacwaga kûnthiria; barocokerwa nî nthao.

¹⁴Ngaatûûra nkwîrîgîrîte; ngûkumagie magiita jonthe.

¹⁵Ngaatûmagîîria mathithio jaaku jamaagîru mbîîranage ûrîa wonokanagia magiita jonthe, kinya këethîra ntîûmba kûmenya ûrîa jang'ana.

¹⁶Gwe Mûrungu ûrî inya înyiingî, tontû bûu ngaakumagia waagîru bwaaku akî.

¹⁷Itû Mûrungu nî ûnditanîte kuuma wîthî bwaakwa, kinya nandî no ntûmagîîria mathithio jaaku ja kûrigaria.

¹⁸Kinya ndaakûra ndauma mbuî, gwe Mûrungu ûgantiganîria, Naani ngatûmagîîria mathithio jaaku ja inya kîrî nthukî irîa ikeeja.

¹⁹Itû Mûrungu waagîru bwaaku bûrî gûntû kunthe Gwe ûthithîtie mantû jamanene; gûtî we ûkari ta gwe.

²⁰Gwe nî ûtûmîte nkoona mathîîna jamaingî, îndî gwe ûgampûûmbanîîra kaîrî, ûndite gîkuûne ûmbonokie.

²¹Gwe ûgampongeera gîtîîo gîkînene na ûmboorerie kaîrî.

²²Itû Mûrungu waakwa, ni ngaagûkumia na wandîîndî nîûntû gwe ûrî mwîtîkua. Ngaakwinagîra ndwîmbo cia gûgûkumia na kînanda kîa ndigi inyiingî Mûrungu Ûrîa Mûtheru wa Israeli.

²³Ngaakwinagîra na kajû ngwîrîîtue; nkwinagîre ngîgûkumagia nîûntû bwa kûmbonokia.

²⁴Nkeeranaga mûthenya junthe ûrîa ûrî na inya ya kwonokania. Nîkwîthîrwa barîa bacwaga kûnthithîria ûthûûku nî ûthirîtie kûboomba na wabeekîrithia nthao.