Read KIMERU BIBLE PROTESTANT EDITION Zab 72 Bible Online

Zab 72 - KIMERU BIBLE PROTESTANT EDITION bible

Zab 72

¹Itû Mûrungu tûma mûnene agiitanagîre magamba na îota, tontû ûrî ûmwagîru.

²Agiitagîre antû baaku magamba na îota, agiitagîre antû baaku barîa bathangîkagua ûrîa kwagîrîte.

³Tûma nthîgûrû îreetagîre antû baaku ûthinyaari; nîûntû bwa waagîru bwaaku.

⁴Mûnene aromenyagîîra nkîa ateethagie antû barîa barî na moobatu; na ûûmbage buru antû barîa bainyagîîria bangî.

⁵Antû barokûthaathayia magiita jonthe; ûtukû na mûthenya bakûthaathagie nthukîîne cionthe.

⁶Mûnene arokara ta ngai îrîa yuragîra nyaki îkariiba; arokara ta ngai îrîa yuraga nthîgûrû ntimeene.

⁷Îgiita rîonthe rîa waathani bwaawe, waagîru bûrotûûra, nayo thîîrî îrotûûra kenya na kenya.

⁸ Ningî mûnene aroathanaga kuuma îrieene mwanka îrieene rîngî, na kuuma rûûjî rwa Eufurate mwanka nthîgûrû yonthe.

⁹Tûma anthû baawe barîa batûûraga rwanda bamwathîkagîre, nabo anthû baawe boombwe buru.

¹⁰Anene ba Tarishishi na ba icîgîîrio bia îria baromûreetagîra ûgoti; anene ba Sheba na Seba baromûreetagîra biewa.

¹¹Tûma anene bonthe ba nthî bamwathîkagîre mîgongo yonthe îmûtumîkagîre.

¹²Nîkwîthîrwa mûnene nî ateethagia barîa barî thîînene bamûkaîra; ningî agateethia nkîa irîa ikwenda ûteethio.

¹³Nî aigagîîrua barîa batî inya na barîa barî thîînene kîaao; nî onokagia barîa bakûnyamaara.

¹⁴Gwe nî weebagîria barîa bainyîîrîîtue ûthûûku, ûkaaboonokia batîkooragwe.

¹⁵Mûnene arotûûra matukû jamaingî; akaeejagwa thaabu ya kuuma Sheba; antû bakamûrombagîra magiita jonthe, bakamwîtagîria itharimo ntukû cionthe.

¹⁶Nthîgûrû îrogîta maketha jamaingî irîma birokunîkwa nî imera; nthîgûrû îrouma maciara jamaingî ta ja nthîgûrû ya Lebanoni; antû bathegee ntûûreene baingîe ta nyaki bieniine.

¹⁷Riîtwa rîa mûnene rîrotûûra kûririkanagwa magiita jonthe, nkuma yaawe îrotûûra kenya na kenya. Antû barotharimanaga na riîtwa rîaawe; mîgongo yonthe îromwîtaga “Mûtharime.”

¹⁸Arokumagua MWATHANI Mûrungu wa Israeli, we akî ûthithagia mantû ja kûrigarania.

¹⁹Riîtwa rîaawe rîrokumagua kenya na kenya; ûkumio bwaawe bûroûjûra nthîgûrû yonthe! Amen na Amen!

²⁰Jûjû nîju mûthia jwa maromba ja Daudi mûtaana wa Jesii.