Read KIMERU BIBLE PROTESTANT EDITION Zab 73 Bible Online

Zab 73 - KIMERU BIBLE PROTESTANT EDITION bible

Zab 73

¹Nî mma Mûrungu nî ûmwega kîrî Israeli; kîrî barîa atheru.

²Îndî ni ndîraarî akuî gûterûka; ndîraarî akuî kûgiitara,

³nîûntû bwa kwigîîrua antû babaaî rûriitho ndoona ûrîa bakûthinyaara.

⁴Nîkwîthîrwa mîîrî yaao îtûûraga kindaajî; gûtî thîîna boonaga.

⁵Bo batîthangîkaga antû bangî bakîthangîka; batîonaga mathîîna jarîa antû bangî boonaga.

⁶Tontû bûû, rwikumio rwaao rwonekanaga; ta ûrîa mûkathî jwonekanaga jwîkîri.

⁷Beendeete ndwaa mono ta ûrîa muntû eendaga gwîkîra nguû, bo boojûri ûthûûku akî, nkoro ithûgaanagia mantû jamaaî.

⁸Bacikûûraga bangî bakiugaga ûrîa bakabathithîria ûthûûku; baikumîtie bakabanga ûrîa bakaainyîîria bangî.

⁹Bamenagîîria bakameneeria kinya Mûrungu ningî bakameneeria antû bonthe.

¹⁰Antû barîa beetîkîtie Mûrungu, bagarûkaga bakathingata mîîtîre ya antû babaaî; bakathingata mantû jonthe jarîa babeeraga.

¹¹Antû babaaî baugaga gûtî u Mûrungu oomba kûmenya Ûrîa Ûrî Îgûrû buru gûtîu amenyekia.

¹²Ûu nîu barîa baaî batûûraga; magiita jonthe batûûraga kiindaji, na ûtonga bwaao bûkoongeeraka.

¹³Gûtî ûguni nkoona ndaakara ntîkwîyia na kinya ndaakara ndî ûmwagîru gûtî wega nkoona.

¹⁴Mûthenya junthe ntindagîra mpûûrwa na nkarookerua îkanûkia o rûkîîrî o rûkîîrî.

¹⁵Ndîngîuga, “Ka-mbarie tabo,” ndîngîîthîrwa nkîthûûkîria antû baaku.

¹⁶Ndaagererie kûthûgaania nkîenda kûmenya ûrîa ûntû bûbû bûkari îndî mantû jarampûûmîra.

¹⁷Mwanka rîrîa ndeetîre kîûrûûne gîaaku; rîu nîrîo ndaamenyere ûrîa barîa baaî bagakara.

¹⁸Nî mma Gwe ûbeekaga gûntû gûgûtenderu; ûgatûma bakagwa bakathira.

¹⁹Bathiragua o ntûti bagakondorua nî imakania bia ûgwaati.

²⁰Booragîria o ta ûrîa kîrooto kîûragîria muntû ookîîra; rîrîa gwe MWATHANI weeja gûnteethia bo bathiraga buru.

²¹Rîrîa ndaarî na mûthûûro; rîrîa nkoro yaakwa yaigagua ûrûrû,

²²ndaariti nkaminamina; ndaakari ta mbiti ya kîthaka ntaamenyaga ûrîa weendaga.

²³Amwe na bûu nî nkaraga akuî naagwe magiita jonthe, ûgantongeeria bûbwega.

²⁴Ûntongagîîria na kîrîra gîaaku, na mûthieene ûkanjûkia ûkambikia ûkumioone.

²⁵Nûû ûngî ûrî îgûrû ndî nawe tiga gwe? Nîmbi îngî nkwenda nthîgûrûûne tîga gwe?

²⁶Ndoomba kwaga inya ya mwîrî na nkoro, îndî Mûrungu nîwe inya yaakwa magiita jonthe.

²⁷Gûtî nkaanja barîa bakwîrûkagîra bakaûra; barîa batîgwîtîkîtie gwe ûkabathiria.

²⁸Îndî ni ndîona bûrîa bwega nî gûkara akuî na Mûrungu; nîkenda MWATHANI Mûrungu aa giiciitho gîaakwa, naani mbîîranage mantû jonthe jarîa athithîtie.