Read KIMERU BIBLE PROTESTANT EDITION Zab 74 Bible Online

Zab 74 - KIMERU BIBLE PROTESTANT EDITION bible

Zab 74

¹Itû Mûrungu nîkî ûtûtiganîrîtie ûjû? Nîkî mûthûûro jwaaku jûtwingîîrîte tuî ng'ondu cia ndîîthia yaaku?

²Ririkana kîûthûrano kîa antû baaku barîa waithuurîîre kuuma karaaja; barîa wakûûrîre ûrabaethia mwîrîga jwa antû baaku. Ririkana kîrîma kîa Zaiûni kîrîa kîrî gîtûûro gîaaku.

³Njû ûcionere maganjo Ûcionere ûrîa kîûrû kîmomorangi nî anthû.

⁴Anthû baaku barîkûngûîra ûûmbani bwaao barî arîa kîûrû gîaaku kîaarî. Baandîte bendera ciaao ku irî ndwano cia ûûmbani bwaao.

⁵Baatemangîre mîrango ya kîûrû na ntûûru, ta antû bakûrîîka mîtî mwitûûne.

⁶Nacio mbaaû ciaakîo irîa nthongi cionthe baraciatûranga na ntûûru na ibûi.

⁷Baamuuntîrie kîûrû gîaaku mwanki, beekîra mûgiro antû arîa ûthaathagîrua.

⁸Baaciîtîrie barauga atîrî, “Tûrîbakinyanga buru” baaîthîrie irombero bionthe birîa antû baaku bakûthaathagîria nthîgûrûûne.

⁹Biama biaaku tûtîbionaga nandî; iroria nî biathirîre, na gûtî weetû wiijî mantû jaja jagakara mwanka rî.

¹⁰Itû Mûrungu, nî mwanka rî mûnthû agaakara agîgûcikûûraga? Nîka mûnthû agaakûthûmbia mwanka kenya?

¹¹Nîkî tontû ûtweete meetho ûtîgûtûteethia? Nîkî ûkûrega kûritithia inya yaaku ngûgî?

¹²Îndî nî mbijî atî Mûrungu nîwe ûtwîre arî mûnene weetû; atwîre gûtwonokia kuuma karaaja.

¹³ Nîgwe wagaanîrie rûûjî rwa îria ûgîtumagîra inya yaaku; nîgwe waathetherangîre nkûnga.

¹⁴ Nîgwe watontomorangîre biongo bia nyamû ya rûûjî îrîa îtagwa Leviathani, ûracînenkanîra kîrî nyamû cia kîthaka iracirîa.

¹⁵Nîgwe waatûmîre ithima na tûmîuro tuuma nthî ningî wanyaaria mîuro îmînene.

¹⁶Mûthenya nî jwaaku, na ûtukû nî bwaaku; nîgwe woombîre mweri na njota, na kinya riûa.

¹⁷Nîgwe weekîre mîanka ya nthîgûrû yonthe; nîgwe wathûranaga biingo bia riûa na bia mpio.

¹⁸Itû MWATHANI ririkana atî mûnthû nî agûkûthûmbia; antû batîkwiijî nîbo bagûgûcikûûra.

¹⁹Tuî antû baaku tûtî inya; twonokie kuuma kîrî anthû beetû ûkorweeja gûtîîjîra antû baakû barîa barî thîîneene.

²⁰Ririkana kîrîkanîro gîaaku naatuî nîûntû gûtî o nthîgûrûûne gûtî na ûgwati.

²¹Menya ûreka barîa batwîre bainyîîrîîtue beekîrithua nthao; tûma barîa batî inya boone gîa gûgûkumîria.

²²Itû Mûrungu njû ûciarîîrie; nîûntû barîa batîkwiijî ka batindaga gûkûthekera magiita jonthe.

²³Menya ûkira nîûntû anthû batindaga gûtûkurîra.