Read KIMERU BIBLE PROTESTANT EDITION Zab 76 Bible Online

Zab 76 - KIMERU BIBLE PROTESTANT EDITION bible

Zab 76

¹Mûrungu nî aijîkeene nthîgûrûûne ya Juda; riîtwa rîaawe rîrî nkuma ndeene ya Israeli.

²Gîkaro gîaaku nî Jerusalemu, ûtûûraga kîrîmeene gîa Zaiûni.

³Kûu nîku waaunangîre mîgwî ya anthû, na rong'o ciaao, na nchiû, na mathaga jangî ja ndwaa.

⁴Gwe ûrî mwago nkûrûki ya irîma; irîma birîa bitwîre o kuuma tene.

⁵Nchamba cia ndwaa nî ciûmbi ndweene ciatunywa birîa itaîte. Itîûmba kwiringîra nîûntû nî bakuîte.

⁶Gwe Mûrungu wa Jakubu, ûgondokagîra anthû, bo amwe na mbarathi ciaao bakagwa bagakua.

⁷Gwe ûrî wa kûmakania. Nûû ûûmba gûkûûmîîria rîrîa ûgwati nî marûrû.

⁸Wamenyithanîrie ûrîa ûgiitîte îgamba ûrî kûu îgûrû; antû nthîgûrûûne baraigua ûguaa barakira ki.

⁹Nîrîo waagiitîre îgamba, nîkenda woonokia barîa bonthe bainyagîîrua nthîgûrûûne.

¹⁰Kinya antû barîa baathûûraga mono bagaagûkumagia; barîa bakoonoka mûthûûro jwaaku bagaitumaga kîrî gwe.

¹¹Ûjûragieeni mîciîtio îrîa bwîkîte kîrî MWATHANI Mûrungu weenu. Nayo mîgongo îrîa îbûthiûrûkîrîte îmûreetagîre biewa, nîûntû Mûrungu nî wa gûkîragwa.

¹²Nî We ûthiragia athani inya; agatûma anene bakamûkîra.