Read KIMERU BIBLE PROTESTANT EDITION Zab 78 Bible Online

Zab 78 - KIMERU BIBLE PROTESTANT EDITION bible

Zab 78

¹Thikîîreeni buî antû beetû bwigue ûritani bwaakwa; kindeeni matû bwigue nteto irîa nkwaria.

² Nkaaria na ngerekano; mbûmenyithie mantû ja kûrigaria jarîa jaarîrue kuuma tene.

³Najo nî mantû jarîa twigîtue na tûkajamenya, jarîa twîri nî biûjûjû bieetû.

⁴Tûtîrega kwîra aana beetû mantû jau; îndî tûkajeeranaga kîrî nthukî irîa ikeeja. Twîranage mantû jarîa MWATHANI aathithia ja kûrigaria.

⁵Mûrungu nî aaere nchiarwa cia Jakubu maathana, Israeli aramîaa Waatho. Waatho bûu nîbu eerîre biûjûjû bieetû biritanage nchiarwa ciaao.

⁶Nîkîo gîtûmi nthukî îbuîrîte kûmenya Waatho bûu nîkenda yûmba kûritana nthukî îngî îrîa îkeeja.

⁷Kîu nîkîo gîgaatûma barîa bagaaciarwa beetîkia na batîûrîrua nî mantû jarîa aathithia, îndî bagaatûûra bamenyeerete maathana jaawe.

⁸Nabo batîkara ta biûjûjû biaao. Biûjûjû biaao biaarî antû ndemi ntîîrîka iteetîkagia Mûrungu.

⁹Antû ba Efuraimu nî baamatûkîre ndweene, kinya këethîra nî baarî na moota na mîgwî.

¹⁰Nî baaregere kûûjûria kîrîkanîro kîaao na Mûrungu, na bararega kûthingata Waatho bwaawe.

¹¹Nî boorîîrue nî mantû jarîa aathithîtie, na baroorîrua nî biama birîa aaringîte.

¹² Biûjûjû bia Efuraimu, nî bionere Mûrungu akîringa biama kûu bûûrîîne ya Zoani nthîgûrûûne ya Misri.

¹³ Mûrungu aagaanîrie rûûjî rwa îria, aratûma barakûrûkîîra ku rûûjî rûrûngami ta nthingo.

¹⁴ Aabatongagîîria na îtu mûthenya, ûtukû akabatongeeria na kinyiinga.

¹⁵ Aatûrangîre maiga rwanda aratûma baroona rûûjî rûrwingî ta rwa îria.

¹⁶Aatûmîre rûûjî rûrauma maigeene rûreenama rûrî mûuro.

¹⁷Îndî bareeta na mbere kwîyia barî rwanda, bararega kwathîkîra Mûrungu Ûrîa Ûrî Îgûrû buru.

¹⁸ Beetîrie Mûrungu biakûrîa bakîmûgeria.

¹⁹Biûjûjû bia antû ba Israeli nî biaacikûûrîre Mûrungu bakîûragia atîrî, “Mûrungu oomba kwona biakûrîa bia gûtwaa rwanda rûrû?

²⁰Nî mma oomba gûtwaa biakûrîa na kinya nyama nîûntû nî aaringîre iiga rîrauma rûûjî rûrwingî rûraa mûuro jûmûnene?”

²¹Rîrîa MWATHANI aamenyere nteto iu nî aathûûrîre mono aragwatwa nî marûrû nîûntû bwa nchiarwa cia Jakubu araingîîrwa nî mûthûûro nîûntû bwa Aisraeli.

²²Nîkwîthîrwa nî baarî bakûrega gwîtîkia Mûrungu na bateetîkagia atî oomba kûboonokia.

²³Amwe na bûu, Mûrungu nî eerîre mîrango ya îgûrû îrugûke;

²⁴ nawe aratûma manna yuura ta ngai, arabaa biakûrîa kuuma îgûrû.

²⁵Antû bararîa biakûrîa o ta birîa araîka baarîîjaga, arabanenkera biakûrîa bibingî bia kûng'ana.

²⁶Mûrungu nî aatûmîre ruuo rûraurutana kuuma bwa gaiti, inya yaawe îratûma ruuo rwa bwa ûmotho rûraurutana.

²⁷We nî aatûmîre nyoni inyiingî mono antû baawe baroona nyama inyiingî.

²⁸Aratûma nyoni iu iragwa kambîîne ciaao, iroojûra kûrîa kunthe kûrîa kwaarî na maema.

²⁹Mûrungu arabanenkera irio birîa beendaga, bararîa baranyira.

³⁰Îndî mbere ya barîa banyira, kinya mbere ya bameria biakûrîa biu,

³¹Mûrungu arathûûra mono nîbo, arooraga barîa baarî na inya na nthaka cia Israeli.

³²Îndî amwe na jau jonthe, nî beetîre na mbere kwîyia; o amwe na biama biu bionthe, bateetîkia.

³³Tontû bûû, arakuîyia ûtûûro arabweethia bwa ûtheri, baratûûra ûtûûro bwa mîthangîko.

³⁴Rîrîa Mûrungu ooragîre bamwe baao nîrîo bangî baairirîre, baraambîrîria kûmûthaathayia na mma.

³⁵Nîrîo baaririkanaga atî Mûrungu nîwe giiciitho kîaao, bakaririkana atî Mûrungu Ûrîa Ûrî Îgûrû buru nîwe mûkûûri waao.

³⁶Nî kwaria baaragia akî, îndî nkoro irî na waayia.

³⁷ Nabo bataamwathîkîra, na batoojûria kîrîkanîro kîrîa beekanîrîte na Mûrungu.

³⁸Amwe na bûu, nî aabaigîrîîrue kîaao, arabarekera meeyia na ataabathiria. Nî aagwatagwa nî mûthûûro jamaingî îndî akaigwata.

³⁹Mûrungu nî aamenyaga atî bo nî antû ba gûkua bakari ta ruuo rûrîa rûkûrûkaga rûtîcoke kaîrî.

⁴⁰Barî rwanda nî baaeejaga ndemi mono bagatûma Mûrungu akathûûra mono.

⁴¹Bakaraga bakîgeragia Mûrungu, Ûrîa Mûtheru wa Israeli bagatûma akaigua bûbûûî.

⁴²Boorîîrue atî arî na inya, na baroorîrua atî nîwe waaboonokerie kuuma kîrî anthû baao;

⁴³Rîrîa baarî bûûrî ya Zoani nthîgûrûûne ya Misri nî aaringîre biama.

⁴⁴ Aagarûrîre ndûûjî ciaao iraa tharike, mwanka antû ba Misri bararemwa nî gûcinyua.

⁴⁵ Aabatûmîîre mîrumbî ya ngii cia kûbathangîkia, na arabatûmîra biûra birabathangîkia mono.

⁴⁶ Aatûmîre mpaandi irathûûkangia imera, aratûma ngigî irarîa miuunda yaao.

⁴⁷ We nî aatûmîre ngai ya nchûgû îreenyangia mîzabibû yaao, araîîthia mîkûû yaao na nkamia.

⁴⁸Aarekererie ng'ombe ciaao irathirua nî ngai ya nchûgû, nacio ng'ondu na mbûri ciaao irooragwa nî ngorogoro.

⁴⁹Aabatûrîkîîrie marûrû jaawe, na mûthûûro jwaawe arabareetera mîthangîko. Biu biaakari ta bitûmi bireeta gîkuû.

⁵⁰Aabeerekeerie mûthûûro jwaawe, na ataabacaîîra; aabooragîre na mîrimo îmîthûûku.

⁵¹ Ooragîre aana ba kîranga bonthe ba nthîgûrû ya Misri, arooraga ba mbere ba nchiarwa cia Hamu.

⁵² Îndî Mûrungu aratongeeria antû baawe ta ûrîa mûrîîthi atongagîîria ng'ondu, arabatongeeria bareetîîra rwanda o ta ndîîthia.

⁵³ Bataakîraga nîûntû aabatongeererie njîreene itî na ûgwati; arathirîria anthû baao îrieene.

⁵⁴ We nî aabakinyîrie nthîgûrû yaawe întheru, kîrîmeene kîrîa aatuunyanîte na inya.

⁵⁵ Mûrungu nî eetîre akîîngagîra Aisraeli anthû, rîrîa Aisraeli beetîte Kanaani; aratûma batûûra kûrîa anthû baao baatûûraga.

⁵⁶ Îndî antû ba Israeli nî baaere ndemi kîrî Mûrungu, Ûrîa Ûrî Îgûrû buru bararega kwathîkîra maathana jaawe.

⁵⁷Bararega kwaa eetîkua kîrî Mûrungu o ta biûjûjû biaao; barakara ta ûta bûbûregeru.

⁵⁸Antû ba Israeli nî baathûûrîrie Mûrungu nîûntû bwa kûthaathayia mîrungu ya mîng'uanano na nîûntû bwa gûntû kûrîa bamîthaathagîria.

⁵⁹Rîrîa Mûrungu oonere ûrîa baathithagia nî aabathûûrîre mono nîûntû nî athûûri nîbo.

⁶⁰ Ningî Mûrungu nî eerûkîîre arîa aathaathagîrua ntûûreene ya Shilo, îemeene arîa aakaraga amwe na antû.

⁶¹ Ararekeeria Îthandûkû rîa kîrîkanîro rîtawa nî anthû, na nîrîo rîonanagia inya na ûkumio bwaawe.

⁶²Aatûrîkîîrie antû baawe mûthûûro arabarekeeria barooragîrwa ndweene.

⁶³Nthaka ciaao cioragîîrwe ndweene, aarî baao baraaga ba kûbagûra.

⁶⁴Athînjîri-Mûrungu booragîîrwe ndweene aka baao bateetîkîîrua kûbarîrîra.

⁶⁵Mûthieene Mûrungu nî ookîrîîre ta muntû aumîte toroone akari ta muntû ûrî na inya woogitîtue nî ndibei.

⁶⁶Nî eenganîre na anthû baawe arabeekîrithia nthao mwanka kenya.

⁶⁷Îndî we nî aathûûrîre nchiarwa cia Josefu na ataathuurîre mwîrîga jwa Efuraimu.

⁶⁸Îndî nî aathuurîre mwîrîga jwa Juda, na kîrîma gîa Zaiûni kîrîa eendeete mono.

⁶⁹Kûu nîku aakîre kîûrû kîaawe gîkîraaja ta kîrîma na gîkîriku ta nthî irîa aarikîrie kuuma tene.

⁷⁰ Mûrungu nî aathuurîre Daudi nthûûmba yaawe, aramûrita bûûrîîne;

⁷¹kûrîa aarîîthagia ndîîthia ciaawe, aramweethia mûrîîthi wa nchiarwa cia Jakubu tabo antû ba Israeli.

⁷²Daudi nî aabamenyereere, arabarîîthia bwega na ûûme.