Read KIMERU BIBLE PROTESTANT EDITION Zab 79 Bible Online

Zab 79 - KIMERU BIBLE PROTESTANT EDITION bible

Zab 79

¹ Itû Mûrungu, antû barîa batîkwijî nî baithûkîrîte nthîgûrû yaaku, baathûûkia kîûrû gîaaku, na baathiria Jerusalemu yaa îgaanjo.

²Batûma mîîrî ya antû baaku îrîîwa nî nyoni, biimba bia antû baaku biarîîwa nî mbiti.

³Booragîre antû baaku tharike yaao îreenama ta rûûjî kûu Jerusalemu. Gûtî muntû waatigarîre wa kûbathika.

⁴Tûkurungagwa nî mîgongo îrîa îtûthiûrûkîrîte, tûkameneerua nî antû barîa twankeene nabo.

⁵Itû MWATHANI, ûkathûûra nî tuî mwanka rî? Mûthûûro jwaaku jûgakara jwakanîte ta mwanki mwanka rî?

⁶Erekeria mûthûûro jwaaku kîrî mîgongo îrîa îtîkwijî na ûjwerekerie kîrî antû ba moonene ja barîa batîkûthaathagia.

⁷Nîkwîthîrwa bo nî booragîte nchiarwa cia Jakubu Baatiga nthîgûrû ya Israeli îkari ta îgaanjo.

⁸Ûgátûkanûkia nîûntû bwa meeyia ja biûjûjû bieetû, twigîîrue kîaao ûtûteethie ntûti nîkwîthîrwa tûtî na wîrîgîîro buru.

⁹Itû Mûrungu Mwonokia weetû tûteethie. Tûtuunyûkie nîûntû bwa riîtwa rîaaku rîa ûkumio ûtûrekere meeyia nîûntû bwa riîtwa rîaaku.

¹⁰Nîkî tontû mîgongo îngî yûragia atîrî, “Arîkû Mûrungu waao?” Mîkanûkie nîûntû bwa kûûraga antû baaku.

¹¹Reka kîrîro kîa barîa barî ncheera kîgûkinyîre, wonokie bonthe barîa bagiitîri îgamba kûûragwa.

¹²Itû MWATHANI irîîrie mainda mûgwanja kîrî mîgongo yonthe îrîa îkûrumaga.

¹³Rîu tuî antû baaku, nî tuî ndîîthia yaaku, na tûgagûkaathaga magiita jonthe na nthukî cionthe igaagûkumagia.