Read KIMERU BIBLE PROTESTANT EDITION Zab 80 Bible Online

Zab 80 - KIMERU BIBLE PROTESTANT EDITION bible

Zab 80

¹ Gwe ûrîîthagia Israeli tûthikîîre, gwe nî ûrîîthagia nchiarwa cia Josefu. Gwe waathaga ûrî îgûrû rîa akerubimu, thaara.

²Ûthaarîre mwîrîga jwa Efuraimu na jwa Benjamini na jwa Manase. Twonie atî ûrî inya wîje ûtwonokie.

³ Itû Mûrungu, tûcokanîîrie, ûtwonie ûthiû bwaaku naatuî tûkoonoka.

⁴Itû MWATHANI Mûrungu Mweneinya, nî mwanka rî ûgakara ûthûûri nîûntû bwa maromba jeetû tuî antû baaku?

⁵Ûtûmîte kîeba gîkaa biakûrîa bieetû na meethori jakaa bia kûnyua.

⁶Mîgongo îrîa îtûthiûrûkîrîte îtûmenagîîria rîrîa îkûrwaa, nîkenda îmenya nî mûgongo jûrîkû jûkajûkia nthîgûrû yeetû.

⁷ Itû Mûrungu Mweneinya, tûcokanîîrie, ûtwoonie ûthiû bwaaku naatuî tûkoonoka.

⁸Tuî twakari ta mûzabibû rîrîa waatûritîre Misri, ûrenga mîgongo îngî ûratwaanda nthîgûrûûne îîjî.

⁹Nî waathuranîîre muunda nîkenda ûjwaanda, nayo mîri yaaju nî yeenamîre nthîgûrû, naju jûrataamba nthîgûrûûne kunthe.

¹⁰Kîthiîki kîaaju nî gîaakunîkîre irîma nacio mpang'i ciaaju iraitania na mîtarakwa îmînene.

¹¹Mpang'i ciaaju nî ciataambîre irakinya îria rîa Mediterania, na ingî irakinya mûuroone jwa Eufurate.

¹²Nîkî ûntû ûtharîîtie rwego rûrîa rûrajûthiûrûkîrîte? Nandî antû barî njîreene nîka bakwiya nzabibû.

¹³Mûzabibû jûu jûrîîjagwa na jûgakinyangwa nî nyamû cia kîthaka.

¹⁴Itû Mûrungu Mweneinya tûraithîrie ûrî îgûrû, ûtûririkane tuî mûzabibû jwaaku.

¹⁵Njû woonokie mûzabibû jûrîa waandîre gwengwa wamenyeera jwakûra na jwagîta inya.

¹⁶Anthû beetû nî bajûtemeete baajûgera mwankiine, bakanûkie ubathirie buru.

¹⁷Itû karîa antû baaku ûbamenyeere, nîbo mûgongo jwaaku jûrîa wîkîrîte inya.

¹⁸Tuî tûtîregana naagwe kaîrî, twîîke mwoyo naatuî tûgaakûthaathayia.

¹⁹Itû MWATHANI Mûrungu Mweneinya, tûcokanîîrie ûtwonie ûthiû bwaaku naatuî tûkoonoka.