Read KIMERU BIBLE PROTESTANT EDITION Zab 82 Bible Online

Zab 82 - KIMERU BIBLE PROTESTANT EDITION bible

Zab 82

¹Mûrungu arî gîtîîne kîaawe kîa ûnene, nî agambagîra kîûthûrano kîa mîrungu ya mîng'uanano.

²“Nî nwanka rî bûgakara bûkîgambanagîra bûtî na îota? Nî mwanka rî bûgaakara bûkîendagîîra barîa baaî?

³Bûbuîrîte gûtûma barîa batî na inya na aana barîa batî na aciari bagambîrwa na îota. Bûgatûma barîa bainyagîîrua na nkîa, bathithîrua ûrîa kwagîrîte.

⁴Onokagieni nkîa na barîa batî na inya bûbatuunyûkagie kuuma kîrî barîa baaî.”

⁵“Mîrungu îîu gûtî u iijî na gûtî u îmenyaga, îtûûraga muunduune; nayo mîsingi ya nthîgûrû yonthe îkainaina.

⁶ Mbugaga buî bûrî mîrungu, nkathûgaania nî buî ataana ba Ûrîa Ûrî Îgûrû buru.

⁷Îndî buî bûgaakua o ta ûrîa antû bakuujaga bûthire o ta ûrîa anene ba nthî bathiraga.”

⁸Itû Mûrungu, ambîrîria kûgambîra nthîgûrû, nîûntû mîgongo yonthe nî yaaku!