Read KIMERU BIBLE PROTESTANT EDITION Zab 84 Bible Online

Zab 84 - KIMERU BIBLE PROTESTANT EDITION bible

Zab 84

¹Nîatîa kîûrû gîaaku kîrî gîkîthongi, Îgwe MWATHANI Mweneinya!

²Mwoyo jaakwa jûnyontagîra kîûrû kîa MWATHANI, nkoro na mwîrî jwaakwa jwinagîra Mûrungu ûrîa ûtûûraga mwoyo, jûgwîrîtue.

³Gwe MWATHANI Mûrungu Mweneinya, mûnene waakwa kinya gacîncîgîrî nî kethagîrwa karî na gîtara ku na mûgûrû nî jwaakaga kiuru ku ikarerera twaana twaacio akuî na iritîro bia igongwana.

⁴Kîtharimo nî kîrî barîa batûûraga kîûrûûne giaaku, bagîgûkumagia na gûkwinîra magiita jonthe!

⁵Kîtharimo nî kîrî barîa baeethagia MWATHANI inya yaao barîa bairîragîîria gwîta kûthaathaîria Mûrungu Zaiûni.

⁶Bagîkûrûkîîra kîguuruune kîa Baka, ndûûjî ikauma ku, na ngai ya mûratho îkaura, rûûjî rûkaigara ku.

⁷Beetaga bakîongagîîra inya beetîte Zaiûni, bakinya ku bakoona Mûrungu we ûrîa waathaga mîrungu yonthe.

⁸Îgwe MWATHANI Mûrungu Mweneinya Igua îromba rîaakwa; nthikîîra, îgwe Mûrungu wa Jakubu.

⁹Itû Mûrungu, tharima ûrîa ûtûkaragia, ûmenyeere mûnene ûrîa ûthuurîte.

¹⁰Nî kaaba ndî kîûrûûne ntukû îmwe, nkûrûki ya ndî gûntû kûngî ntukû ngiri. Nî kaaba kwîthîrwa ndî mûkaria mwari jwa kîûrû nkûrûki ya kwîthîrwa ndî ikaroone bia barîa baaî.

¹¹MWATHANI Mûrungu nîwe ûtûmûrîkagîra na agatûkaria nîwe ûtwigagîîrua kîaao na agatwaa gîtîîo. Gûtî gîntû gîkîega MWATHANI ataga barîa beetaga na mîîtîre îrîa yagîrîte.

¹²Îgwe MWATHANI Mweneinya, kîtharimo nî kîrî muntû ûrîa ûgwîtîkagia.