Read KIMERU BIBLE PROTESTANT EDITION Zab 85 Bible Online

Zab 85 - KIMERU BIBLE PROTESTANT EDITION bible

Zab 85

¹Itû MWATHANI, nî wigîîrîtue nthîgûrû yaaku kîaao wacokeria nchiarwa cia Jakubu mawega jaao.

²Gwe nî ûrekerete antû baaku meeyia jaao, weebia maatia jaao jonthe.

³Gwe nî ûtiganîte na marûrû jaaku weebia mûthûûro jwaaku junthe kîrî tuî.

⁴Tûcokanîîrie kaîrî, ûtige gûtûthûûra itû Mûrungu Mwonokia weetû.

⁵Nîka ûgatûûra ûthûûri nî tuî mwanka kenya? Nîka mûthûûro jwaaku jûgataamba kîrî nthukî cionthe?

⁶Twîkîre inya kaîrî nîkenda tûkaraga tûgwîrîtue nîûntû bwaaku.

⁷Itû MWATHANI, twonie wendo bwaaku bûrîa bûtîthiraga, na ûtwonokie.

⁸Ka nthikîîre ûrîa MWATHANI Mûrungu akuuga, nîûntû akaa antû baawe wîrîgîîro bwa kûgîa na thîîrî. Bau nî atheru barîa batîcoka kûthithia mantû ja waa kaîrî.

⁹Nî mma, wonokio bwaawe bûtî kûraaja na barîa bamûkîraga. Agaatûûraga nthîgûrûûne yeetû arî na ûkumio bwaawe bunthe.

¹⁰Wendo bûrîa bûtîthiraga, bûkairinganîra na gwîtîkîka waagîru na thîîrî bitûûranie amwe.

¹¹Gwîtîkîka gûkauma nthî gwitîîtie nabu waagîru bûraithîrie bûrî îgûrû.

¹²Îî, MWATHANI agaatûtharima nthîgûrû yeetû yoongeere maketha.

¹³Waagîru bûgeetaga bûrî mbere yaawe bûkîmûthuranagîîra njîra.