Read KIMERU BIBLE PROTESTANT EDITION Zab 89 Bible Online

Zab 89 - KIMERU BIBLE PROTESTANT EDITION bible

Zab 89

¹ (Zaburi ya Ethani ûmwe wa rûrîîjo rwa Ezra.) Itû MWATHANI, ngaakwinagîra ngîkumagia wendo bwaaku bûrîa bûtîthiraga, mbîîranage ûrîa ûrî mwîtîkua magiita jonthe.

²Nîkwîthîrwa wendo bwaaku gûtî rîo bûthiraga, na gwîtîkîka gwaaku gûgaatûûra o kenya o ta îgûrû.

³Gwe nîgwe waaugîre atîrî, “Nî mbîkîte kîrîkanîro na nthûûmba yaakwa Daudi ndeeka wîrane na nthuure yaakwa:

⁴ ‘Gûkethagîrwa kûrî na muntû wa nchiarwa ciaaku ûrîa ûkethagîrwa arî mûnene nîkenda rûrîîjo rwaaku rwathanaga nthukî cionthe.’”

⁵Itû MWATHANI, îgûrû nî riinaga rîgîkumagia mantû jamanene jarîa ûthithagia nabo araîka boothûranîte bagakumia gwîtîkîka gwaaku.

⁶Nûû ûûmba kûng'uanithanua na MWATHANI kûu îgûrû? Kîrî biûmbe bia îgûrû nûû ûûmba kûng'ananua na MWATHANI?

⁷Kîrî barîa batûûraga îgûrû gwe Mûrungu nî ûkîri nî araîka; nabo bakûthiûrûkaga bagîgûkumagia.

⁸Itû MWATHANI Mûrungu Mweneinya gûtî we ûrî inya ta ûgwe. Gûtî we ûrî mwîtîkua mantûûne jonthe ta ûûgwe.

⁹Gwe nî waathaga îria rîrîa rîkûruuma na ûkaboreria mîgombe yaaringana mono.

¹⁰Gwe nîgwe wooragîre nyamû ya îria îrîa îtagwa Rahabu ûratumîra inya kûnyagania anthû baaku.

¹¹Îgûrû nî rîaaku na kinya nthîgûrû nî yaaku; nthîgûrû na birîa bionthe birî ku nîgwe waabiûmbîre.

¹²Nîgwe woombîre rûteere rwa bwa ûmotho na rwa ûrîo kîrîma kîa Tabori na kîa Herimoni nîgwe biinagîra bikîgonga riîtwa rîaaku.

¹³Nîatîa ûrî inya! Inya yaaku nî înene mono.

¹⁴Mûsingi jwa waathani bwaaku nî Waagîru na îota. Jonthe jarîa ûthithagia nî joonanagia wendo bwaaku bûrîa bûtîthiraga na gwîtîkîka gwaaku.

¹⁵Kîtharimo nî kîrî antû barîa baijî gûgûkûngwîra nabo batongagîîrua nî weerû bwaaku.

¹⁶Nabo batindaga bagwîrîtue bagîgûkumagia nîûntû bwa waagîru bwaaku.

¹⁷Gwe nîgwe ûtweejaga inya yaaku înene wendo bwaaku bûgatûma tûkoombana.

¹⁸Gwe MWATHANI nîgwe ûtûthuuragîra ûrîa ûtûkaragia. Gwe Mûtheru Mûrungu wa Israeli nîgwe watweere mûnene.

¹⁹Tene nî waaragia na njîra ya kîoneki kîrî antû baaku barîa bagwîtîkîtie, ûkauga atîrî, “Nî nthuurîte ûmwe wa antû ba Israeli nawe nî nchamba ya ndwaa ndamweethia mûnene.

²⁰ Nthûûmba yaakwa Daudi nî îîtûûrîrîîtue maguta jamatheru yaa mûnene.

²¹Nkethagîrwa ndî amwe nawe magiita jonthe, mwîkagîre inya.

²²Anthû batîmûkîria ûûme barîa baaî batîmûûmba.

²³Ni nkathiria anthû baawe na mbûrage barîa bamûthwîre.

²⁴Nkaa mwîtîkua kîrî we na mwendage nchooke mweejage ûûmbani.

²⁵Ngatûma waathani bwaawe bûtaambe kuuma îrieene rîa Mediterania mwanka mûuroone jwa Eufurate.

²⁶Akaambîîraga atîrî, ‘Nîgwe baaba na nîgwe Mûrungu waakwa, nîgwe ûnkaragia na nîgwe Iiga rîa wonokio baakwa.’

²⁷ Nkamweethia mwana waakwa wa kîranga mweethie mûnene wa anene bangî.

²⁸Nkamwendaga magiita jonthe na gûtî rîo kîrîkanîro gîaakwa nawe gîkathira.

²⁹Nkatharimaga nchiarwa ciaawe kenya na kenya na ûmwe wa rûrîîjo rwaawe akethagîrwa akîathanaga.

³⁰Nchiarwa ciaawe ciarega kwathîkîra Waatho bwaakwa na ciarega gwîta na mîîtîre îrîa mbeerîrîte,

³¹ikëeja kûregana na jarîa mbaritanîte, na ikarega kwathîkîra maathana jaakwa,

³²rîu, nkaabakanûkia nîûntû bwa meeyia jaao mbaûre nîûntû bwa maatia jaao.

³³Îndî gûtî rîo wendo bwaakwa kîrî Daudi bûkaathira kana ntiga kwaa mwîtîkua kîrî we.

³⁴Gûtî rîo nkaathûkia kîrîkanîro gîaakwa nawe kana ngarûra noo bûmwe bwa jarîa ndaamûciîtîrie.

³⁵Nciîtîrîtie Daudi riîtweene rîaakwa rîrîa rîtheru rîmwe rîa kûng'ana atî ntîkoromwaîria.

³⁶Nchiarwa ciaawe ikaathanaga mwanka kenya na gûtî rîo waathani bwaawe bûkorothira.

³⁷O ta ûrîa mweri jwîthagîrwa jûrî o nîu waathani bwaawe bûkethagîrwa bûrî o naju nî mûkûûjî wa mma jûrî îgûrû.”

³⁸Îndî gwe MWATHANI nî ûthûûrîtue nî mûnene ûrîa ûthuurîte naagwe wamwîrûkîra wamûrega.

³⁹Nî ûthûûkîtie kîrîkanîro gîaaku na nthûûmba yaaku mûnene weekîra waathani bwaawe mûgiro.

⁴⁰Nî ûtûmîte nthingo cia ntûûra yaawe ciamomorangwa na biitiiro biaawe biathirua buru.

⁴¹Barîa bakûrûkaga na njîra baiyaga into biaawe, nabo antû ba mîgongo îrîa ankeene nabo nîka bamûthekagîra.

⁴²Gwe Mûrungu nî ûtûmîte anthû baawe bakagîa inya, watûma anthû bonthe bagwîrua.

⁴³Nî ûtûmîte mathaga jaawe ja ndwaa jaa ja ûtheri warega kûmûteethia ndweene.

⁴⁴Nî ûmûtuunyîte rûturo rwaawe rwa waathani watûma waathani bwaawe bwathira.

⁴⁵Gwe nî ûnyiîtie ûtûûro bwaawe watûma acokerwa nî nthao.

⁴⁶Itû MWATHANI, ûgaakara wiciithîte mwanka rî? Mûthûûro jwaaku jûgakara jûgwakanîte mwanka rî?

⁴⁷Itû MWATHANI, ririkana ûrîa ûtûûro bwaakwa bûkuîîtue, na ûririkane atî waatûûmbîre tûrî ba gûkua.

⁴⁸Nî muntû ûrîkû ûûmba gûtûûra mwoyo na atîkue? Nûû ûûmba kwonokia mwoyo jwaawe kuuma gwa akuû?

⁴⁹Itû MWATHANI, wendo bwaaku bûrîa bûtîthiraga bwa tene nîkû bweetîre? Kûrî kû gwîtîkîka gwaaku kûrîa waaciîtîîrie Daudi?

⁵⁰Itû MWATHANI, ririkana ûrîa ni nthûûmba yaaku meni, na ûrîa mpûmîîrîtie irumi bia mîgongo îrîa îtîkwijî.

⁵¹Itû MWATHANI anthû baaku bakaraga bakîrumaga mûnene ûrîa ûthuurîte, kunthe kûrîa areetîîra.

⁵²MWATHANI arokumagua kenya na kenya! Amen na Amen.