Read KIMERU BIBLE PROTESTANT EDITION Zab 9 Bible Online

Zab 9 - KIMERU BIBLE PROTESTANT EDITION bible

Zab 9

¹Ngagûkaathaga MWATHANI na nkoro yaakwa yonthe; mbîîranage mantû jonthe jarîa ûthithîtie ja kûrigarania.

²Nkaagwîragua ngûkumagie mbinage ngîkumagia riîtwa rîaaku gwe Ûrîa Ûrî Îgûrû buru.

³Anthû baakwa bakwonaga bakagarûka bakamatûka, bageeta bakîgûûjaga bagakua.

⁴Gwe nî ûgiitîte îgamba na îota; woonania atî ndî ûûmeene.

⁵Nî ûkanûkîtie mîgongo îrîa îtîgwîtîkîtie; ûthirîtie barîa baaî buru, waangûra riîtwa rîaao kenya na kenya.

⁶Anthû beetû bathirîtue buru; ntûûra ciaao cienyangua buru; gûtî gîntû gîaatigara gîa gûtûma baririkanwa kaîrî.

⁷Îndî MWATHANI agatûûra arî mûnene mwanka kenya; agambanagîre arî rûrigeene raawe rwa waathani.

⁸Agiitagîra nthîgûrû yonthe îgamba na îota; agatuîra antû magamba na waagîru.

⁹MWATHANI nîwe giitiiro kîa barîa bainyagîîrua; nîwe kîmatûkîro kîaao îgiita rîa thîîna.

¹⁰Barîa bakwijî beekaga wîrîgîîro bwaao kîrî gwe, nîkwîthîrwa gwe MWATHANI, ûtîtiganagîria barîa bagûcwaga.

¹¹Inîreni MWATHANI ûrîa ûtûûraga Zaiûni ndwîmbo cia kûmûkumia; tûmîîrieni mathithio jaawe kîrî mîgongo yonthe.

¹²Nîkwîthîrwa we ûrîa ûrîagia nyamuurû nî aririkanaga barîa bakûthîîna; we atîûragîrua nî kîrîro kîa barîa bainyîrîtue.

¹³Itû MWATHANI mbigîîrua kîaao! Tega ûrîa nkûthangîkua nî barîa banthwîre; gwe nîgwe ûnditaga mûromoone jwa gîkuû.

¹⁴Naani nkaamenyithia antû ba Jerusalemu jarîa jonthe jatûmaga ngûkaatha. Naani nkaagwîragîrua wonokanio bwaaku.

¹⁵Mîgongo îrîa îtîîtîkîtie MWATHANI nî îgwîte îrinyeene rîrîa îreenjîrîte anthû baao yagwatwa nî mûtego, jûrîa barategeetie bongwa.

¹⁶MWATHANI nî aimenyithanîtie na matua jaawe jamaagîru. Barîa baaî bagwatagua nî mantû jarîa bathithagia bongwa.

¹⁷Antû barîa baaî ba mîgongo yonthe îrîa îtîtîkîtie Mûrungu beerekerete gîkuûne.

¹⁸Barîa barî na ûbatu batîûrîria na nkîa itîaga wîrîgîîro mwanka kenya.

¹⁹Njû îtu MWATHANI! Ûkaareka antû boombana; mîgongo îrîa îtîtîkîtie, nî îîje mbere yaaku ûmîgambîre.

²⁰Bamakie gwe MWATHANI; tûma antû ba mîgongo îrîa îtîîtîkîtie bamenya atî bo nî antû bakujaga.