Read KIMERU BIBLE PROTESTANT EDITION Zab 90 Bible Online

Zab 90 - KIMERU BIBLE PROTESTANT EDITION bible

Zab 90

¹Itû MWATHANI, nthukîîne cionthe gwe ûtûûraga ûrî giiciitho gîeetû.

²Mbere ya irîma biûmbwa kana ûûmba nthîgûrû yonthe; kuuma kenya na kenya, gwe ûtwîre ûrî Mûrungu.

³Gwe nîgwe ûcokagia muntû narîa aumîre tîîriine ûkiugaga atîrî, “Buî aana ba antû, cokeeni tîîriine!”

⁴ Nîkwîthîrwa kîrî gwe mîaka ngiri, nî ta ntukû ya îgoro o îrîa îrakûrûkîre kana ta mathaa jamakai ja ûtukû.

⁵Ûthiragia antû ntûti ta kîrooto; bagakara ta nyaki îrîa yumaga rûkîîrî.

⁶Rûkîîrî îkariiba na îkathongoma mono, îndî gûgîkinya ûgoro îkeethîrwa îkûnyaara.

⁷Ûng'eentaga ûgatûmakia ûgatûthiria na mûthûûro jwaaku.

⁸Gwe nî wîkîte maatia jeetû mbere yaaku, na kinya meeyia jeetû ja witho nî ûjoonaga.

⁹Ntukû cieetû ithirangaga ntûti nîûntû bwa mûthûûro jwaaku, ûtûûro bweetû bûkathira ta gûkindûka.

¹⁰Ûtûûro bweetû nî bwa mîaka mîrongo mûgwanja tûkeethîrwa tûrî na inya twakinya mîaka mîrongo înaana. Îndî ûtûûro bûu nî bwa thîîna na mînoga, nayo mîaka îîu îthiraga ntûti naatuî tûkathira.

¹¹Nûû wiijî ûrîa mûthûûro jwaaku jûrî inya îng'ana? Rûng'ento rwaaku nî rûng'aneene na ûguaa bûrîa rûtwîkagîra.

¹²Tûritane kûmenya ntukû irîa tûrî nacio naatuî tûkoomîa.

¹³Itû MWATHANI, ûgaakara ûthûûri mwanka rî? Twigîîrue kîaao tuî nthûûmba ciaaku.

¹⁴Tûma tûng'anagîrwe o rûkîîrî o rûkîîrî nî wendo bwaaku nîkenda tûkaraga tûgwîrîtue na tûkenete ûtûûroone bweetû bunthe.

¹⁵Tuma tûgwîrue îgiita rîng'ana ta rîrîa twoneete thîina.

¹⁶Twonie tuî nthûûmba ciaaku mantû jarîa ûthithîtie ja kûrigaria wonie nchiarwa cieetû mantû ja inya jarîa ûthithagia.

¹⁷MWATHANI Mûrungu weetû tûtharime tûûmbanage mantûûne jonthe. Îî ûtharime ngûgî irîa tûritaga.