Read KIMERU BIBLE PROTESTANT EDITION Zab 92 Bible Online

Zab 92 - KIMERU BIBLE PROTESTANT EDITION bible

Zab 92

¹Nî ûntû bûbwega gûgûcokagîria nkaatho gwe MWATHANI, na gûkumagia riîtwa rîaaku gwe Mûrungu Ûrîa Ûrî Îgûrû buru.

²Nî ûntû bûbwega kûmenyithanagia mantû ja wendo bwaaku o rûkîîrî o rûkîîrî na kûmenyithanagia gwîtîkîka gwaaku o ntukû o ntukû.

³Nî ûntû bûbwega gûkwinîra na wandîîndî tûgaagûkumia na inanda bia ndigi inyiingî.

⁴Gwe MWATHANI mantû jarîa ûthithagia ja kûrigaria nî jangwîragia. Nkaina ngwîrîîtue nîûntû bwa ngûgî irîa ûritaga.

⁵Gwe MWATHANI ûthithagia mantû jamanene na gûtî we ûûmba kûmenya mathûgaanio jaaku.

⁶Kûrî mantû kîaa gîtîûmba kûmenya na muntû ûtî na ûûme atîûmba gûciûra.

⁷Atî barîa baaî bakûraga ta îria bagakara bakîthinyaaraga amwe na bûu bakaathirua buru.

⁸Îndî gwe MWATHANI, ûthûngûûrîîtwe kenya na kenya.

⁹Nî mma anthû baaku bakaathirua gwe MWATHANI bakaathirua buru; barîa baaî bonthe banyaganue.

¹⁰Nî ûtûmîte nkagîa inya înyiingî ta mbogo na wambîtûûrîria maguta wanthuura.

¹¹Nî mboneete anthû baakwa bakîûmbwa, na ndaigua barîa baaî bakîrîra bakîthirua.

¹²Barîa baagîru bariibaga ta mûkîndû na bagakûra ta mîtarakwa ya Lebanoni.

¹³Nîkwîthîrwa baandi kîûrûûne kîa MWATHANI ta mîtî, bariibaga barî kîaragoone kîa nyomba ya Mûrungu weetû.

¹⁴Kinya baatindira batîagaga maciara boonekaga barî babaanake na barî na inya.

¹⁵Nabo baugaga atî MWATHANI nî ûmwagîru na nî kîrî we twiciithaga.