Read KIMERU BIBLE PROTESTANT EDITION Zab 94 Bible Online

Zab 94 - KIMERU BIBLE PROTESTANT EDITION bible

Zab 94

¹Gwe MWATHANI ûkanûkagia barîa baaî ûkîbarîyia, thaara ûcionanie.

²Gwe ûgiitagîra antû bonthe magamba, Ithuranîre ûgiitîre aikumia ûrîa kwagîrîte.

³Itû MWATHANI, nî mwanka rî barîa baaî bagakara bo bagwîrîtue?

⁴Bakaraga bagîtûrumaga barîa baaî bonthe bagakara bagîtwikumagîria.

⁵Itû MWATHANI, barîa bainyagîîria antû baaku bakathethera barîa withurîrîte.

⁶Nîkwîthîrwa nî booraaga ntigwa na aana barîa bakuîri nî aciari na ageni barîa batûûraga nthîgûrû yeetû.

⁷Barîa baaî baugaga atîrî, “MWATHANI atîonaga ûrîa tûkûthithia; Mûrungu wa Jakubu atîtindanagîra na mantû jeetû. Atîûmba kûmenya ûrîa tûkûthithia.”

⁸Buî barîa bûriiti nkûrûki ya bangî gîeni ûûme! Biaa nîrî bûkagîa kîrîra?

⁹Mûrungu nîwe waatweere matû, ka atîûmba kwigua? Nîwe waatweere meetho; ka atîûmba kwona?

¹⁰We ûrîa ûkanûkagia mîgongo atîûmba gûkanûkania? We ûritanaga antû, atî ûûme?

¹¹ MWATHANI nî aijî mathûgaanio ja antû bonthe akamenya atî mathûgaanio jaao nî ja ûtheri buru.

¹²Kîtharimo nî kîrî muntû ûrîa gwe MWATHANI ûkanûkagia, ûrîa gwe ûritanaga Waatho bwaaku.

¹³Ûmweejaga wega rîrîa kûrî na thîîna mwanka barîa baaî bakathirua buru.

¹⁴Nîkwîthîrwa MWATHANI atîenda gûtiganîîria antû baawe na atîîrûkîra antû barîa athuurîte.

¹⁵Magamba jakagiitagwa na îota nabo barîa baagîru bageetîkania na magamba jau.

¹⁶Nûû ûkaarûngama agambane na barîa baaî antûûne aakwa? Nûû ûkaambigîka nkîgambana na barîa baaî?

¹⁷Këethîra MWATHANI ataanteetherie ntîngî ndî o.

¹⁸MWATHANI, rîrîa ndaciîraga atîrî, “Ngûterûka”, kîaao gîaaku kîrîa gîtîthiraga kîrangwatîîra.

¹⁹Rîrîa ndaaritûîri nî mantû nkoroone gwe nî waamboragîria nkaigua nkîgwîrua.

²⁰Gwe woomba kwîthîrwa ûrî rûteere rwa agiiti magamba babaaî, barîa bagarûraga Waatho bûkaaga îota?

²¹Bo bagwatanagîra bakîenda kûthiria barîa baagîru bakagiitîra antû batî na maatia gîkuû.

²²Îndî MWATHANI nîwe weete giiciitho gîaakwa Mûrungu nîwe ûnkaragia.

²³MWATHANI Mûrungu weetû akaabarîaa kûringana na meeyia jaao, abathirie buru nîûntû bwa ûthûûku bwaao.