Read KIMERU BIBLE PROTESTANT EDITION Zab 95 Bible Online

Zab 95 - KIMERU BIBLE PROTESTANT EDITION bible

Zab 95

¹Njûûni twinîre MWATHANI tûgwîrîtue tûkûngwîre Mûrungu ûrîa ûtwonokagia.

²Nî twîte kîrî we tûrî na nkaatho nî tûmwinîre na nkerû ndwîmbo cia kûmûkumia.

³Nîkwîthîrwa MWATHANI nî Mûrungu ûmûnene na mûnene ûmûnene kîrî mîrungu yonthe.

⁴Nîwe waathanaga nthîgûrûûne yonthe kuuma rungu rwa nthîgûrû mwanka tûthûmbi twa irîma.

⁵Îria nî rîaawe nîûntû nîwe waarîûmbîre na nîwe woombîre nthîgûrû înjûmo.

⁶Njûûni tûthaathayie MWATHANI, tûturie maru mbere yaawe, nîkwîthîrwa nîwe waatûûmbîre.

⁷ Nîkwîthîrwa nîwe Mûrungu weetû naatuî tûrî ûrîîthi bwaawe. Nî tuî ndîîthia îrîa amenyagîîra. Bwaigua kajû kaawe naarua,

⁸ bûkoomieni nkoro, ta ûrîa biûjûjû bieenu biaathithîrie kûrîa Meriba rîrîa baarî rwanda antû gweetagwa Masa.

⁹Au nîo biûjûjû bieenu biaangereerie kinya këethîra nî booneete mantû jarîa ndaathithîtie.

¹⁰Nîkwîthîrwa nthukî îîu nî yaanthûûrîîtie mîaka mîrongo îna, naani ndîrauga atîrî, “Baba nî antû bagarûkangaga ntûti na bataamenya njîra ciaakwa.”

¹¹ Tontû bûû, ndîraciîtia nthûûri ndîrauga atîrî, “Batîtonya kînogokoone gîaakwa.”