Read KIMERU BIBLE PROTESTANT EDITION Zab 96 Bible Online

Zab 96 - KIMERU BIBLE PROTESTANT EDITION bible

Zab 96

¹Inagîreeni MWATHANI rwîmbo rûrwerû, antû bonthe nthîgûrûûne nî bamwinagîre.

²Inagîreeni MWATHANI na bûkumagie riîtwa rîaawe bûmenyithanagie wonokio bwaawe o ntukû o ntukû.

³Îîranageeni mantû ja ûkumio bwaawe mîgongoone yonthe bwîrage antû bonthe mantû jarîa athithîtie ja kûrigaria.

⁴Nîkwîthîrwa MWATHANI nî ûmûnene na nî abuîrîte gûkumagua. Abuîrîte gûkîragwa nkûrûki ya mîrungu yonthe.

⁵Mîrungu yonthe ya mîgongo îngî, nî mîrungu ya mîng'uanano. Îndî MWATHANI nîwe woombîre îgûrû.

⁶Ûkumio na mwago nî kîrî MWATHANI, na kîûrû kîaawe nî gîkîthongi na kîrî inya.

⁷ Antû ba mîgongo nî baugage atî MWATHANI arî mwago na inya.

⁸Kaathagîîrieni riîtwa rîa MWATHANI, bûkauga rîrî mwago, mûritagîreeni igongwana bûgîîta kîûrûûne kîaawe.

⁹Barîa bonthe barî nthîgûrû nî bathaathagie MWATHANI bagîteetemaga nîûntû we nî ûmûtheru na arî mwago.

¹⁰Tûmagîîrieni kîrî mîgongo yonthe bûkiugaga: “MWATHANI nî ûmûnene, nthîgûrû înjîri yaarika, îtîûmba kwenyeenyeka. We akagiitagîra antû magamba na îota.”

¹¹Îgûrû nî rîgwîrue, na nthîgûrû nî îkene naagwe îria na birîa bionthe birî ku bikuure.

¹²Miuunda na birîa bionthe birî ku birokena, nayo mîtî ya mwitû îkûngûîre îgwîrîtue.

¹³Inîreni MWATHANI nîûntû nî eejîte; eejîte arî mûnene aathage antû na waagîru na îota.