Read KIMERU BIBLE PROTESTANT EDITION Njun 1 Bible Online

Njun 1 - KIMERU BIBLE PROTESTANT EDITION bible

Njun 1

¹ Iji nîcio njuno cia Solomoni mûnene wa Israeli, mûtaana wa Daudi.

²Njuno iji nî cia gûtûma antû bagîa ûûme na cia kûbaritana, nîkenda boomba gûciûra mantû jarîa jarî gîtûmi bwega.

³Nî cia kûritanaga mîtûûrîre îmîega na ûrîa antû babuîrîte kûthithagia mantû ja îota, na ja mma, na jamaagîru.

⁴Nî itûmaga muntû ûtîciûki agaciûka, na igatûma antû babeethî boomîa na boomba gûciûra mantû.

⁵Muntû ûmûûme akëeja kûthingata njuno iu akoongeera ûûme, na iritane ûrîa ûrî kîrîra ûrîa agatûûra.

⁶Muntû akamenya gûciûra njuno na ngerekano na gûciûra biugo bia barîa boome na ntaî ciaao.

⁷ Gûkîra MWATHANI, nîkîo kîambîrîria kîa ûûme. Biaa nîbio bithwîre kûritanwa na gûtaarwa.

⁸Mwana waakwa, thikagîîra abaagu agîkwaa kîrîra na ûkárega ûritani bwa nyakwe.

⁹Nîkwîthîrwa bûgaakûgemia ta kîremba kîa mûtwe kana mûkathî jwa nkingo.

¹⁰Mwana waakwa, kinya eeyia bakageria, bagagûkuucîîria nîkenda ûthithia ûthûûku ûkáthithia ûthûûku.

¹¹Nîkwîthîrwa boomba gûkwîra atîrî, njû, twiciithîre antû tûboorage twithûkîre antû na ûtûrîka kinya bëethîrwa batî na maatia.

¹²Tûbamerie barî mwoyo ta ûrîa mbîrîra îmeragia kiimba, tûbamerie barî mûtûûrû ta ûrîa kiimba kîmeragua nî îrinya.

¹³Naatuî tûcionere into bia goro bia mîthemba yonthe, na tûjûrie nyomba cieetû into bia ûtuunyani.

¹⁴Njû, wee wa mûûrû jweetû, naatuî tûkagaana birîa bionthe tûkaiya.

¹⁵Gwe mwana waakwa, ûgéetania nabo; na ûgákinya njîra barî.

¹⁶Antû bau bathûûku barî mpwîî cia kûthithia ûthûûku, barî mpwîî cia kûûragana.

¹⁷Gûtegia nyoni îkîonaga, nî ngûgî ya ûtheri.

¹⁸Îndî eeyia ta bau bagûûjaga mîtegoone yaao bongwa, bakaithiria nayo.

¹⁹Ûu nîu ngûgî ya ûtuunyani îkari îrigagia na kûûraga kinya ûrîa ûmîritaga.

²⁰ Ûûme nî bûgwîtana na kajû bûrî njîreene cia ntûûra, nî bûgûtûmîîria bûrî thokoone.

²¹Bûrîtûmîîria bûrî îgûrû rîa nthingo, bûkaaria bûrî mpingîroone cia ntûûra bûkiugaga atîrî:

²²“Buî biaa, bûrîenda gûkara bûrî biaa mwanka rî? Bûkaagwîrîrua kûthûûmbia ûûme mwanka rî?

²³Igagueni jarîa mbûkanagia; nkîbûmenyithagia mathûgaanio jaakwa.

²⁴Nîkwîthîrwa mbîtanaga bûkarega kûmbigua, ndabûtambûrûkîria njara mbûthagana, bûkarega gûtindanîîra naani.

²⁵Nî bûregeete kwigua mataaro jaakwa jonthe, gûtî ûntû mbûkanagia bwigua.

²⁶Mathîîna jabwîjîîra, kinya ni nkaabûthekera, na mbûthûûmbie bwejîîrwa nî kîeba.

²⁷Rîrîa kîeba gîkaabwîjîîra ta ngai înene, na thîîna îbwîjîîre ta kîbubani, na bûûjûrwe nî mîthangîko;

²⁸rîu bûkaambîta, naani ndege kûbwîtîka bûgaancwaa mono, îndî bûtîmbona.

²⁹Nîkwîthîrwa nî bwaamenere ûmenyo, na bûrarega kwathîkîra MWATHANI.

³⁰Nî bwaaregere kwigua ndabwatha kîrîra na bûrarega gûtindanîîra na jarîa jonthe ndaabûkaanagia.

³¹Tontû bûû, bûkaagwata mûchaara jwa mathithio jeenu na bûcokerwe nî mantû jeenu jamathûûku.

³²Nîkwîthîrwa biaa bikuujaga nî kûrega kwîrwa, bithiraga nî kûng'anîrwa nî waa.

³³Îndî ûrîa ûnthikagîîra agatûûra kiindaajî, na athinyarîte, atîgûkîra ûthûûku no bûrîkû.”