Read KIMERU BIBLE PROTESTANT EDITION Njun 11 Bible Online

Njun 11 - KIMERU BIBLE PROTESTANT EDITION bible

Njun 11

¹MWATHANI nî athwîre ithimi bia waayia, îndî nî agwîragua nî ithimi bia mma.

²Rwikumio rûreetagîra muntû nthao, ûrîa mûûme nî ûrîa winyiiagia.

³Muntû ûmwega atongagîîrua nî wega bwaawe; îndî muntû mwayia athiragua nî waayia bwaawe.

⁴Ûtonga bûtîûmba kûguna muntû îgiita rîa gûkua, îndî waagîru bwa muntû nî bûmwonokagia kuuma gîkuûne.

⁵Muntû ûmwega atûûragua nî waagîru bwaawe, îndî muntû ûmûthûûku athiragua nî ûthûûku bwaawe wengwa.

⁶Muntû wa ûûma oonokagua nî ûûma bwaawe, îndî muntû mwayia agwatagwa ûkombo nî ûkoroku bwaawe.

⁷Muntû ûmûthûûku akuujaga, wîrîgîîro bwaawe bûkathira, wîrîgîîro bûrîa eekîte kîrî ûtonga bwaawe bûtîmûteethagia.

⁸Muntû ûmwagîru oonokagua thîîneene, îndî ûrîa mûûî agatonya ku.

⁹Muntû ûtiijî Mûrungu oomba kûthûûkia muntû ûngî na mûromo, îndî muntû ûmwagîru oonokagua nî ûûme bwaawe.

¹⁰Ntûûra nî îgwîragua rîrîa antû baayo barîa baagîru boona wega, na barîa batwîre ku bagakûngûîra rîrîa barîa baaî boona thîîna.

¹¹Ntûûra nî îgîîjaga îgweta rîrînene kuumania na itharimo bia antû baayo barîa baagîru, îndî îkanyagua nî nteto cia antû babaaî.

¹²Muntû ûrîa ûmenagîîria muntû ûngî nî ûmûriitu, îndî muntû ûmûûme nî gûkira aikiragîra.

¹³Muntû wa nguutû atîûmba gwîka ûntû bwa witho îndî muntû mwîtîkua atîumbûraga nteto cia witho.

¹⁴Mûgongo jûtî na ûtongeeria bûbwega ka jûgûûjaga, îndî mûgongo jûrîa jûûjûri atongeeria babeega na baboome, nî jûkaraga kiindajî.

¹⁵Muntû ûrîa wîtîkagîîria kûrûngamîîra îraandû rîa muntû atiijî, nîka aitonyagia thîîneene, îndî ûrîa ûregaga kûrûngamîîra îraandû, atîtonyaga thîîneene.

¹⁶Mûka wa nkoro înjega, acionagîra gîtîîo, mûka mûmaramari akojûrwa nî nthaao. Mûntû ûrîa ûkîraga aeejaga nkîa îndî muntû nchamba aigwatagîra ûtonga.

¹⁷Muntû wa kîaao aigunaga wengwa, îndî muntû ûtî kîaao nî thîîna aireetagîîra.

¹⁸Into birîa biumanagia na ngûgî imbîî bitîgunaga muntû, îndî ûrîa ûritaga ngûgî ciagîrîte nî oonaga îtuui rîrîega.

¹⁹Muntû ûrîa ûthingataga ûûma nî atûûraga mwoyo, îndî ûrîa ûcwaga ûûî, no gûkua agaakua.

²⁰MWATHANI nî athwîre antû ba nkoro imbîî, îndî nî agwîragua nî barîa batî îgi mîtîreene yaao.

²¹Menya na mma atî gûtî muntû ûmûthûûku ûgaatigwa atîkanûkîîtue, îndî barîa beega bagaateetha.

²²Ûthongi bwa mûka kîaa nî ta mbete ya thaabu îîkîri nyiûrû ya ngûrwe.

²³Mathûgaanio ja muntû ûmwagîru jareetaga wega, îndî mathûgaanio ja muntû ûmûûî jareetaga mûthûûro.

²⁴Muntû ûrîa weejanaga na magi, ûtonga bwaawe no kwongeereka bwongeerekaga, nawe muntû wa ngoga, gûtî rîo ang'anagia into.

²⁵Muntû ûrîa ûtî ngoga nî atongagua, nawe ûrîa ûteethanagia nî ateethagua.

²⁶Antû nî barumaga muntû ûrîa withaga irio, eeteerete moogûri jaitia, na bagakumia muntû ûrîa wendagia irio biaawe.

²⁷Muntû ûrîa ûcwaga wega, nî abwonaga, na ûrîa ûcwaga ûthûûku, nî abwonaga.

²⁸Muntû ûrîa wîkaga wîrîgîîro kîrî ûtonga bwaawe akaanyaara ta mûtî îgiita rîa thaano, îndî ûrîa mwagîru akaariiba ta mûtî îgiita rîa ngai.

²⁹Muntû ûrîa ûthangîkagia nja yaawe atî kiigai; we nî kîaa na ariganagia na kwaa nthûûmba ya ûrîa mûûme.

³⁰Mathithio ja muntû ûmwagîru jareetaga mwoyo, îndî mathithio ja muntû ûmûûî nîka jareetaga gîkuû.

³¹ Gûkëethîra muntû ûmwagîru nî arîagîrwa gûkû nthîgûrû rî, a-muntû ûmûthûûku na mwîyia bakaarîwua bûng'ana?