Read KIMERU BIBLE PROTESTANT EDITION Njun 12 Bible Online

Njun 12 - KIMERU BIBLE PROTESTANT EDITION bible

Njun 12

¹Muntû ûrîa wendaga gûkaanua ûntû nî ûmûûme, îndî ûrîa ûtîendaga gûkaanua ûntû, nî kîaa.

²MWATHANI nî eendeete muntû ûmwega, îndî nî athwîre muntû ûrîa ûbangagîra bangî mîbango îmîthûûku.

³Ûthûûku bûtîûmba gûtûma muntû airikîria, îndî muntû ûmwagîru arî mîri.

⁴Mwekûrû ûmwega atûmaga mûkûrû waawe agîa îgweta, îndî mwekûrû ûrîa ûthaithagia mûkûrû waawe nî ta mûrimo jwa maîndîîndî kîrî we.

⁵Mataaro ja antû babaagîru nîjo ja mma, îndî mataaro ja antû babaaî nî ja gûta.

⁶Nteto cia antû babaaî nî ciûragaga îndî nteto cia antû babeega nî cionokagia antû.

⁷Antû babaaî batua kûthira bathiraga bakoorîria buru, barîa beega nîbo batûûraga kûririkanwa amwe na nchiarwa ciaao.

⁸Muntû ûmûciûku nî eekagîîrwa nî antû, îndî muntû ûmûriitu nî ameni nî antû.

⁹Nî kaaba muntû ûtî na îgweta ûkûûmba kwiritîra ngûgî, nkûrûki ya muntû ûrîa ûciûkaûkagîîria, îndî atîgûcionera gîa kûrûma.

¹⁰Muntû ûmwega nî amenyagîîra nyomoo ciaawe, îndî muntû ûmûthûûku atî kîaao na ciaawe.

¹¹Muntû ûrîa ûritagîra muunda jwaawe ngûgî nî eethagîrwa arî na irio bibingî, îndî muntû ûrîa ûritaga ngûgî cia ûtheri nî kîaa.

¹²Giitiiro gîa antû babaaî nî gîntû kîa ûtheri, îndî antû babeega baciaandîte ûntû batîûmba kwebaebua.

¹³Muntû ûmûûî aitonyagia thîîneene na nteto cia kanyua kaawe, îndî muntû ûmwagîru nî eebagîra thîîna.

¹⁴Muntû nî oonaga mawega kuumania na nteto irîa aaragia, ningî nî oonaga îtuui kuumania na ngûgî cia njara ciaawe.

¹⁵Muntû ûmûriitu oonaga mîîtîre yaawe îrî îmîega, îndî muntû ûmûûme nî aigagua ûrîa akwathwa.

¹⁶Muntû ûmûriitu oonanagia mûthûûro na mpwîî, îndî muntû ûmûûme kinya akarumwa, atîûragia.

¹⁷Muntû ûrîa waragia nteto cia mma nîwe ûûmba kûrita ûkûûjî bwa mma, îndî mûrongo aritaga ûkûûjî bwa ûrongo.

¹⁸Antû bamwe baaragia nteto ikûmuntana ta rûchiû, îndî barîa boome baaragia nteto cia kûboreria nkoro.

¹⁹Nteto cia mma itûûraga kenya na kenya, îndî nteto cia ûrongo ikaraga kagiita gagakai.

²⁰Barîa babangaga mantû jamaaî nîka baciaagia, îndî barîa babangaga mantû jameega nî bagwîragua.

²¹Antû babaagîru baatîjagîîrwa nî ûthûûku noo bûrîku, îndî antû babaaî nî beejagîîrwa nî mathîîna jamaingî.

²²MWATHANI nî athwîre antû barîa baragia ûrongo, îndî nî agwîragua nî barîa bathithagia mantû ja mma.

²³Muntû ûrî kîrîîkî atîtindaga gûcionania atî nî ûmûûme, îndî kîaa nîka gîtûmagîîria ûriitu bwaakîo.

²⁴Barîa baritaga ngûgî na wîru nîbo baathanaga, îndî ithao biejaga nkombo cia antû bangî.

²⁵Mîruuru nî îritûagia nkoro ya muntû, îndî kiugo gîkîega nî gîtûmaga muntû oothîrwa nî mantû.

²⁶Muntû ûmwagîru oomba gûtongeeria acoore baawe bûbwega îndî muntû ûmûûî aatithagia acoore baawe njîra.

²⁷Mûthao atîkinyagîra kîrîa eendaga, îndî muntû ûrîa ûritaga ngûgî na wîru, aeejaga gîtonga.

²⁸Waagîru bwikagia muntû mwoyoone, îndî waayia bwikagia muntû gîkuûne.