Read KIMERU BIBLE PROTESTANT EDITION Njun 15 Bible Online

Njun 15 - KIMERU BIBLE PROTESTANT EDITION bible

Njun 15

¹Îcokio rîcoketue na ûbooreru nî rîrigagîîria mûthûûro, îndî îcokio rîcoketue na ûng'entu ka rîûkaûkagia mûthûûro.

²Muntû ûmûûme aragia nteto irî kîrîra îndî kîaa kîtherûkaga nteto cia waa.

³Meetho ja MWATHANI joonaga gûntû kunthe, joonaga antû barîa beega na barîa baaî.

⁴Nteto injega ikari ta mûtî jwa mwoyo, îndî nteto inthûûku ga ciûragaga muntû nkoro.

⁵Kîaa gîtiigagua ûrîa aciari bagûkîîra, îndî muntû ûmûûme nî aigagua aakaanua ûntû.

⁶Mûciî jwa muntû ûmwagîru jûrî ûtonga bûbwingî, îndî ûtonga bwa barîa baaî bûtîaatanagia na thîîna.

⁷Antû baboome bataambagia ûûme na rwaria rwaao, îndî biaa bitîthithagia ûu.

⁸MWATHANI nî athwîre igongwana bia barîa baaî, îndî nî eendaga maromba ja barîa baagîru.

⁹MWATHANI nî athwîre mîîtîre ya barîa baaî, îndî nî eendeete barîa bathithagia mantû jamagîru.

¹⁰Muntû ûrîa ûtiganaga na mîîtîre îmîega nî aeejagwa îkanûkia rîrînene na ûrîa ûthwîre gûkaanua no gûkua akuujaga.

¹¹Këethîra MWATHANI nî amenyaga ûrîa gûkarîkaga gwa akuû rî, nîatîa oomba kûremwa nî kûmenya bûrîa bûrî nkoroone cia antû?

¹²Muntû mwikumia atîendaga kwigua agîkaanua maatia, na atîendaga kinya kûûria kîrîra kuuma kîrî barîa boome.

¹³Nkoro îgwîrîîtue nî îtûmaga ûthiû bûkembûka, îndî nkoro îrî na kîeba nayo îtûmaga ûthiû bûtuka.

¹⁴Muntû ûmûûme acwaga kwongeera ûûme, îndî kîaa ikîng'anagîrwa nî kwaria nteto cia waa.

¹⁵Ûtûûro bunthe bwa muntû ûkûthangîka nî bûbûûî, îndî ûtûûro bwa muntû ûgwîrîtue nî bûbwega.

¹⁶Nî kaaba muntû kwîthîrwa arî na into bibikai na akîrîte MWATHANI, nkûrûki ya kwîthîrwa arî na into bibingî na agatûûra thîîneene.

¹⁷Nî kaaba kûrîîra mataanda arîa kûrî na wendo, nkûrûki ya kûrîîra nyama înoru arîa kûrî na rûmena.

¹⁸Muntû wa marûrû nî aringithanagia antû mîtwe îndî muntû ûrîa ûtîthûûrangaga na mpwîî nî abooragîria mateta.

¹⁹Ûtûûro bwa mûthao bûûjûri thîîna ta njîra îrî miigua, îndî ûtûûro bwa muntû ûmwega bûteenderi ta njîra îmbariî îtî kathikî.

²⁰Mwana ûmûûme atûmaga îthe agwîrua, îndî kîaa nîka kîmenithagia ng'ina.

²¹Kîaa kîgwîragîrua waa bwaakîo nîûntû gûtî bûngî kiijî, îndî muntû ûmûûme athithagia mantû ja mma.

²²Ûntû bûtîarîîrîîtue bûtîbuujaga, îndî ûntû bwarîîrîîtue nî antû babaingî bûtîthûûkaga.

²³Muntû nî agwîragua acokia kîûria ûrîa kwagîrîte, kwîthîrwa muntû arî na bwa kuuga rîrîa bûkwendekana, nî ûntû bûbûthongi.

²⁴Mîîtîre ya muntû ûmûûme nî îmûtongagîîria njîreene ya gwitia mwoyoone, nî îmûrigagîîria atîkeename gwa akuû.

²⁵MWATHANI atharagia mîciî ya aikumia, îndî akamenyeera mîciî ya ntigwa.

²⁶MWATHANI nî athwîre mathûgaanio ja barîa baaî, îndî nteto cia barîa baagîru nî imûgwîragia.

²⁷Muntû ûrîa ûrî îtenûka rîa into bia waayia areetagîîra mûciî jwaawe thîîna, îndî muntû ûrîa ûthwîre nkukumo, nî atûûraga îgiita rîrîraaja.

²⁸Muntû wa mma acokagia ûntû ambîte kûthûgaania, îndî muntû ûmûthûûku atherûkaga nteto inthûûku akî.

²⁹MWATHANI akaraga kûraaja na barîa baaî, îndî nî aigagua maromba ja barîa baagîru.

³⁰Ûthiû bûbûkembûku nî bûgwîragia nkoro, nacio nteto injega nî îtûmaga muntû aigua bwega.

³¹Muntû ûrîa wigagua mantû jarîa agûkaanua agaataragwa arî ûmwe wa barîa boome.

³²Muntû ûrîa ûkaanagua ûntû akarega kwigua nîka aithwîre, îndî muntû ûrîa wigagua ûrîa akwîrwa nîka oongagîîra ûmenyo bwaawe.

³³Gûkîra MWATHANI nî gûtûmaga muntû akoomîa kwinyiyia nîkîo kîambîrîria gîa kûgîa gîtîîo.