Read KIMERU BIBLE PROTESTANT EDITION Njun 16 Bible Online

Njun 16 - KIMERU BIBLE PROTESTANT EDITION bible

Njun 16

¹Muntû athithagia mîbango îrîa akwenda, îndî MWATHANI nîwe ûtûmaga yûûmba kûûjûra.

²Muntû athûgaanagia mantû jonthe jarîa athithagia nî jameega, îndî MWATHANI nîwe wiijî kîrîa gîtûmaga muntû athithia mantû jau.

³Îîkaga mantû jarîa ûthithagia kîrî MWATHANI, nawe agaatûmaga joojûra.

⁴Gîntû kîonthe kîrîa MWATHANI oombîte nî aijî ûrîa gîgaakara, kinya barîa baaî nî aijî rîrîa bakaathirua.

⁵MWATHANI nî athwîre muntû mwikumia wonthe, na nî mma gûtî we agaatiga atîkanûkîtie.

⁶Barîa athîki na eetîkua kîrî MWATHANI nîbo barekagîrwa meeyia, na barîa bakîraga MWATHANI nî beebagîra meeyia.

⁷Rîrîa mîîtîre ya muntû îgwîragia MWATHANI, MWATHANI nî atûmaga kinya anthû ba muntû ûu batûûrania nawe na thîîrî.

⁸Nî kaaba kwîthîrwa ûrî na into bibikai ûbicwîte na njîra ya îota, nkûrûki ya kwîthîrwa ûrî na into bibingî ûbicwîte na njîra cia waayia.

⁹Muntû abangaga mantû jaawe îndî MWATHANI nîwe ûmûteethagia kûjoojûria.

¹⁰Nteto irîa mûnene aragia eethagîrwa aguûrîri tontû bûu atîbuîri gûatia akîgiita magamba.

¹¹MWATHANI eendaga ithimi biîthîrwa birî bia mma, o na kinya maiga jarîa jatumagîrwa kûthima.

¹²Mûnene atîbuîri kwenda kwona ûthûûku bûkîthithua, nîûntû waathani bûtûûragua nî mantû jarîa maagîru.

¹³Anene bagwîragua nî barîa baaragia nteto irîa ciagîrîte, na nî beendaga barîa baaragia ûûma.

¹⁴Mûthûûro jwa mûnene jwoomba gûtûma muntû agakua; muntû ûmûûme ka amûbooragîria.

¹⁵Mûnene akëeja kûgwîrua nî muntû, ûtûûro bwa muntû ûu nî bûbuujaga, na kîaao kîa mûnene kîreetaga wega ta ngai yurîte thaano.

¹⁶Kûgîa na ûûme nî gûkwega nkûrûki ya kûgîa na thaabu, nî kaaba kûthuura ûmenyo antû a fetha.

¹⁷Antû babaagîru batîkinyaga njîra ya ûthûûku; muntû ûrîa ûmenyagîîra mîîtîre yaawe nî oonokagia mwoyo jwaawe.

¹⁸Rwikumio nîru rûûraga muntû, mûkuui atiigagua ibeere.

¹⁹Nî kaaba kwinyiiyia ûgakara ûrî nkîa, nkûrûki ya gûtuîka mwikumia kenda ûgaanaga na bangî into bia waayia.

²⁰Muntû ûrîa wigagua ûrîa akwîrwa nî akaraga bwega; nî kaaba muntû ûrîa wîtîkîtie MWATHANI.

²¹Muntû amenyagwa nî ûmûûme nîûntû bwa gûciûra mantû. Rwaria rûrwega nî rûtûmaga muntû ûtîkwenda ûntû abwenda.

²²Ûûme nî kîthima kîa mwoyo kîrî ûrîa ûrî nabu, îndî waa nî îkanûkia kîrî kîaa.

²³Muntû ûmûûme nî athûgaanagia bwega mbere ya kwaria, nabo antû nî beendaga rwarîa rwaawe.

²⁴Nteto inthongi nî ta nainchû, nî igwîragia mwoyo na igeekîra mwîrî inya.

²⁵ Muntû oomba kûthithia ûntû akiugaga nî bûbwega, îndî mûthieene bûkamwikia gîkuûne.

²⁶Kwenda kûrîa nî gûtûmaga muntû arita ngûgî, mpara nayo îmwîkagîra wîru.

²⁷Muntû wa ûtheri athûgaanagia mantû jamathûûku akî, na aaragia nteto ikwîîthania ta mwanki.

²⁸Muntû ûmûûî areetaga rûmena gatîgatîîne ka antû, muntû wa nguutû atûmaga acoore bakaathûkana.

²⁹Ngîti ya muntû nî îkuucagia muntû ûngî, îkamûtonyia thîîneene.

³⁰Muntû ûrîa ûmincagia eene ûthûûku ka eendaga bûkarîka; nawe ûrîa ûkiraga abwene ka eendaga bwîta na mbere.

³¹Mbuî cia mûtwe nî thirû ya ûkumio barîa baagîru boonaga îtuui rîa ûtûûro bûbûraaja.

³²Nî kaaba muntû ûrîa ûtîthûûrangaga na mpwîî nkûrûki ya muntû ûmûng'entu, ningî nî kaaba muntû ûrîa wiijî gûciatha wengwa, nkûrûki ya muntû ûrîa wathaga ntûûra inyiingî.

³³Antû beerekagîîria mantû, îndî MWATHANI nîwe uugaga bwa mûthia.