Read KIMERU BIBLE PROTESTANT EDITION Njun 20 Bible Online

Njun 20 - KIMERU BIBLE PROTESTANT EDITION bible

Njun 20

¹Ndibei nî mûcikûûrani, na ndîbei îndûru nî kîtheetha; muntû ûrîa wangaratanagua nîyo atî ûûme.

²Mûthûûro jûmûnene jwa mûnene nî ta mûrurumo jwa ngatûnyi; muntû ûrîa ûmûthûûragia nî gîkuû aicwagîra.

³Muntû ûrîa ûciathûranaga na mateta arî nkuma, îndî ûrîa ûkaraga agîtetaga nî kîaa.

⁴Mûthao atîrîmaga îgiita rîa marîma; îgiita rîa maketha acwaga gîa gûketha akaaga.

⁵Mathûgaanio ja muntû jakari ta rûûjî rûrî kîthimeene ndeene, Nî muntû ûmûûme ûûmba gûtûma jaumîra.

⁶Nî antû babaingî baugaga nî eetîkua îndî nîkû muntû mwîtîkua oonorekia?

⁷Nî kaaba aana ba muntû ûmwagîru mwîtîkua.

⁸Mûnene akîgiitaga magamba, oonaga arîa ûthûûku bunthe bûrî akabûmenya.

⁹Nûû ûûmba kuuga atî nî ûmûtheru buru nkoroone, na gûtî meeyia arî?

¹⁰MWATHANI nî athwîre ithimi bionthe bia waayia.

¹¹Kinya mwana amenyekaga ûrîa akari na mathithio jaawe jamaagîru.

¹²MWATHANI nîwe ûeejanaga matû ja kwigua, na meetho ja kwona.

¹³Wenda toro mono ûmenye ûkaarîa ûkîa îndî waciata toro, ûtîkoroaga biakûrîa bia kûng'ana.

¹⁴Mûgûri akîgûra anung'unaga akiugaga, “Gîntû gîkî tî gîkîega! Gîntû gîkî tî gîkîega!” Îndî arîîkia kûgûra ageeta agiikumagia ûrîa agûrîte gîntû gîkîega.

¹⁵Thaabu na twiga twa goro nî bibingî, Îndî antû barîa baaragia nteto irî kîrîra nî babakai.

¹⁶Muntû ûrîa wîtîkagîîria kûrûngamîîra îrandû rîa muntû mûgeni gîntû kîaawe kîbuîrîte kûjûkua gîkarûngamîîra mwanka rîrîa akarîrîa

¹⁷Muntû ambaga kwigua mûrîo jwa gîntû kîrîa acwîte na waayia, îndî nyumeene akaigua ta mûthetu arûmîte.

¹⁸Rombaga kîrîra këethîra nî ûkwenda mîbango yaaku îbua; ûgatua gwîta ndweene, romba mataaro kuuma kîrî antû baboome.

¹⁹Muntû wa nguutû atîûmba gwîka ûntû bwa witho; tontû bûu ciathûrane na barîa beendeete kwaria mono.

²⁰Muntû ûrîa ûrumaga îthe kana ng'ina athiraga atîîrîgîrîte ta ûrîa taawa yooragîra muunduune jûmûnene.

²¹Ûtonga bûtî bwa kûthithinîra bûthiraga o na mpwîî.

²²Ûkorouga, “Nkairîîria.” Eteera MWATHANI, na agaagûteethia.

²³MWATHANI athwîre ithimi bionthe bia waayia.

²⁴MWATHANI nîwe ûmenyaga ûrîa ûtûûro bwa o muntû bûgaakara; muntû na bwaawe atîûmba kûmenya ûrîa ûtûûro bwaawe bûgaakara.

²⁵Muntû ûrîa wathûragîra Mûrungu gîntû atîambîte kûthûgaania bwega agacoka kûgarûka ka aitheekaga wengwa na mûciîtio jwaawe.

²⁶Mûnene ûmûûme aathûraga antû barîa baaî kuuma kîrî barîa beega, akabakanûkia.

²⁷Nkoro ya muntû nîyo taawa îrîa MWATHANI amûrîkaga nayo muntû ndeene.

²⁸Mûnene atûûragua waathaniine nî ûûma na îota na kûthithanîria ûrîa kwagîrîte.

²⁹Inya ya antû babeethî nîyo îtûmaga beekîîrwa, mbuî nacio igatûma akûrû bagwatîrwa nthoni.

³⁰Mpûûrwa cia ngûma nî ithiragia ûthûûku; ûrûrû bwa îkanûkia nî bûtheragia nkoro.