Read KIMERU BIBLE PROTESTANT EDITION Njun 22 Bible Online

Njun 22 - KIMERU BIBLE PROTESTANT EDITION bible

Njun 22

¹Kaaba kûgîa na riîtwa rîrîega nkûrûki ya kûgîa na ûtonga bûbwingî, ningî nî kaaba kwendwa nî antû nkûrûki ya kûgîa na fetha na thaabu.

²Nkîa na gîtonga barî ûntû bûmwe bûrîa bûbang'ananagia; bonthe nî MWATHANI ûboombîte.

³Muntû ûmûûme oonaga ûgwati bwîjîte agaiciitha, îndî kîaa gîîtaga na mbere mwanka gîgatonya thîînene.

⁴Muntû ûrîa wathîkagîra MWATHANI na akainyiiyia nî atongaga, na akaeewa gîtîîo na agatûûra îgiita rîrîraaja.

⁵Ûtûûro bwa barîa baaî bûkari ta njîra yûjûri miigua na mîtego îndî ûrîa wimenyagîîra atîcemanagia na mantû ta jau ûtûûroone bwaawe.

⁶Ritana mwana ûrîa abuîrîte gûtûûra, na kinya aakûra atîûrîrua nî ûritani bûu.

⁷Gîtonga kîathaga nkîa, na mwîrandû nî nkombo ya ûrîa ûmweete îrandû.

⁸Muntû ûrîa ûaandaga mbeeû ya ûthûûku kîrî bangî, nî thîîna eethagîrwa agiicwagîra, na kûiinyanîîria kwaawe gûgaakinya mûthia.

⁹Muntû ûrîa wiganagîîrua kîaao, na akarûmia nkîa biakûrîa, nî atharimagwa.

¹⁰Ûkeenga muntû wa tengûri akauma akuî naagwe, nî kûgîîjaga ûboreri, na gîtuma na mateta bikathira.

¹¹Muntû ûrîa ûrî nkoro înjega na waaragia nteto cia kûguna, nîwe ûeejaga mûcoore wa mûnene.

¹²MWATHANI eendaga ûûma bûtûûra, îndî nteto cia ûrongo akaregana nacio.

¹³Mûthao aigwatagia akiugaga atîrî, “Kûrî na ngatûnyi oome”, kana “Ndaumagara nkooragîrwa njîreene.”

¹⁴Rwaria rwa mûka mûthûngîîri nî ta îrinya rîrîraaja; barîa MWATHANI athûûri nîbo, nîbo bagûûjaga ku.

¹⁵Nî wîthîre bwa kaana kûthithia mantû ja waa, îndî îkanûkia rîa kathanju nî rîtûmaga gakarekana na waa bûu.

¹⁶Muntû ûrîa ûiinyagîîria nkîa nîkenda atonga na akaeejana biewa kîrî itonga, agatuîka nkîa.

¹⁷Kinda gûtû wigue nteto cia ûûme, na ûthingatage ûrîa ngûkûritana.

¹⁸Nîkwîthîrwa nî bûbwega kwîthîrwa ûkîîmenyaga, na ûkoombaga kwiririkanaga cionthe rîrîa ûkwaria.

¹⁹Ndîkûritana cio kinya gwe nandî, nîkenda ûûmba gwîtîkia MWATHANI.

²⁰Nî mma nî nkwandîkîrîte njuno mîrongo îthatû cia ûûme, cia gûgûtaara na gûkwaa kîrîra.

²¹Ndîkûritana nteto ciongwa ûrîa ikari, kenda ûûmbaga gûcokia ûrîa kwagîrîte woorua kîûria.

²²Ûkoroiinyîîria nkîa tontû nî nkîa, kana ûiinyîîria antû batî-kîene magambeene.

²³Nîkwîthîrwa MWATHANI akabateteera îgambeene na abarwîrîîre kîrî barîa babaithûkagîra.

²⁴Menya ûtuma ûcoore na muntû ûthûûrangaga na mpwîî, kana wîtania na muntû wa marûrû,

²⁵ûtîkeeje kûgwata mîîtîre yaawe, witonyia thîînene.

²⁶Menya ûtuîka wa barîa bacieejanaga kûrûngamîîra marandû ja bangî,

²⁷nîûntû ûkëeja kûremwa nî kûrîaa, bagagûtuunya kinya gîtanda ûmamîrîte.

²⁸Ûkorogarûra mwanka jwa kîthaka ûjûritarita arîa jûtwîre jwîki nî biûjûjû bieenu.

²⁹Ûkoona muntû ûkûmenya ngûgî yaawe bwega, ûmenye akaarigania na gûtumîkîra anene antû a gûtumîkîra antû batî na gîtîîo.