Read KIMERU BIBLE PROTESTANT EDITION Njun 23 Bible Online

Njun 23 - KIMERU BIBLE PROTESTANT EDITION bible

Njun 23

¹Ûkëeja gûkara nthî kûrîîjanîra na mûnene, ûkórîrua nûû ûkûrîîjanîra nawe;[2]

²wëethîrwa ûrî muntû wa kîu, wigwate.

³Ûkárîa irio biu biaawe na ûkîa nîûntû oomba kwîthîrwa nîka agûkûgeria nabio.

⁴Ûgáciîkîra ngiitû ûgîcwaa ûtonga wee muntû ûmûûme ûkûûmba kwithimîra ngûgî.

⁵Tontû ûkîringia ûtonga meetho akî, nî bwîtîre; bûgakara teeka bwauma mathagu bwabuurûka.

⁶Ûkárîa biakûrîa bia muntû wa ngoga kana wirîrîîria biakûrîa biaawe bibithongi.

⁷Nîkwîthîrwa kinya agakwîra “Rîa na ûnyue”, nkoroone yaawe tîu akwenda.

⁸Ûkaarigania na gûtaîka irio biaawe birîa ûrîte, na rwaria rûrûthongi rûrîa ûmwarîrîtie rwee rwa ûtheri.

⁹Ûkáinogia ûkîarîria kîaa, nîûntû kîo nooka gîkaamaria ûûme bwa nteto ciaaku.

¹⁰Ûkoroogarûra mwanka jûrîa jûtwîre jwîki kuuma tene, kana ûjûkia ithaka bia aana batî na aciari.

¹¹Nîkwîthîrwa MWATHANI nîwe mûkûûri waao na arî inya, na akaarwaa naagwe arî rûteere rwaao.

¹²Gwaataga ûritani na ûthikagiîre bwega nteto cia kîrîra.

¹³Ûkárega gûkanûkia mwana; uuga ûtimûcûnia nîûntû kathanju gatîûragaga mwana.

¹⁴Waamûcûnia na kathanju, ûkaamwonokia kuuma gîkuûne.

¹⁵Mwana waakwa, rîrîa ûkoomîa, nkaagwîrua.

¹⁶Ngaakena mono rîrîa nkaigua ûkîaria mantû jaagîrîte.

¹⁷Ûkáirîrîria gûkara ta eeyia; îndî gwe îta na mbere kwathîkagîra MWATHANI magiita jonthe.

¹⁸Wäthithia ûu ûkeethîrwa ûrî na ûtûûro bûbwega nyumeene, na ûtîkoroaga wîrîgîîro.

¹⁹Gwe mwana waakwa thikîîra ûgîe ûûme, na ûmenyeere mantû jegiî ûtûûro bwaaku.

²⁰Ûgátuma mûûrû na antû barîa banyunyaga mbogita kana barîa barîîjaga mpûûna.

²¹Nîkwîthîrwa barîa banyunyaga mbogita na barîa barîîjaga mpûûna, bariganagia na kûthîîna. Ûthao no bûtûme muntû akathirîrwa kinya nî nguû cia mwîrî.

²²Igagua bwa aciari baaku nîûntû nîbo baagûciarîre, na ûkaabamena baatindira.

²³Cwaaga ûûma na ûûme, na kîrîra, na ûmenyo, na waabioona ûkábirekeeria.

²⁴Mûciari wa mwana ûmwega nî eethagîrwa arî na gîkeno gîkînene, ûrîa ûgîîjaga na mwana ûrî na ûmenyo nî agwîragua.

²⁵Reka abaagu na nyakwe bagwîrague, tûma nyakwe akenage nîgwe.

²⁶Mwana waakwa, igagua ûrîa ngûkwîra, na ûthingatage mîîtîre yaakwa.

²⁷Ririkanaga atî mûka mûmaraya nî îrinya rîa kûûrîra; mûka mûmaramari nî mûtego.

²⁸We akabagîra muntû ta ûrîa mûtuunyani akabaga, na agatûma arûme babaingî bata nja ciaao.

²⁹Nûû ûtûûraga athangîkîte? Nûû ûtûûraga aithikîîrîte? Nûû ûtûûragia thaanga? Nûû ûtûûraga kûnung'una? Nûû ûtûûraga gwîkîrwa ngûma ûtheri? Nûû ûtûûraga atuunîîtie meetho?

³⁰Nî muntû ûrîa ûtindaga kûnyua ndibei; ûrîa ûnyunyaga ndibei cia mîthemba yonthe.

³¹Menya wigua ûkîa bwa ndibei woona ûrîa îrî întuune, îgîkengakengaga îrî gîkombeene, kana îkîmerûka bwega.

³²Mûthieene ndibei îrûmanaga ta njoka; îkaratha muntû ta arûmi nî kiua.

³³Nyumeene îtûmaga ûkoona marwîrwî, na ûkathûgaania mantû jatîagîrîte.

³⁴Ûgaaciigua ta muntû ûrî îrieene gatîgatî, ûkwegegua arî gîtarûûne.

³⁵Naagwe ûcokaga kuuga atîrî, “Nî bandingîte, îndî gûtî u mbigîîtue; nî bampûûrîte îndî ntîkwigua mûrimo. Rîrîa ngookîîra, ngeeta gûcwaa îngî mînyue.”