Read KIMERU BIBLE PROTESTANT EDITION Njun 24 Bible Online

Njun 24 - KIMERU BIBLE PROTESTANT EDITION bible

Njun 24

¹Ûkáirîrîria gûkara ta antû babathûûku, kana wirîrîria gûtuma mûûrû nabo,

²tontû bo bathûgaanagia mantû ja kûthangîkia bangî akî, na baaragia nteto cia kûreeta thîîna akî.

³Nja yaakagwa na ûûme, na îgatûûrua nî ûmenyo.

⁴Nabu ûmenyo bûûjûragia nyomba cia nja îîu na into bibithongi na bia goro.

⁵Nî kaaba ûûme nkûrûki ya inya ûmenyo bûkûrûkîîte inya înene.

⁶Muntû abuîrîte gwîta ndweene aathi kîrîra bwega, nîkenda oona ûûmbani, abuîrîte kwîthîrwa arî na amwathi kîrîra babaingî.

⁷Kîaa gîtîûmba gûciûra mantû ja ûume, kana kîona bwa kuuga kîameene.

⁸Muntû ûrîa ûbangaga ûthûûku eetagwa muntû wa thanga.

⁹Kûbangîra bangî ûthûûku nî meeyia ûrîa ûthithagia ûu eetagwa ngîti.

¹⁰Ûkoona ûtîkwirikîria îgiita rîa thîîna ûmenye gûtî kainya ûrî nako.

¹¹Tuunyûkagia barîa beetîte kûûragwa na woonokagie barîa batuîri kûûragwa batî na maatia.

¹²Kinya waciîra atî, “Ntîkûmenya ûrîa ûntû bûbû bûkari,” Mûrungu ûrîa ûmenyaga mathûgaanio ja muntû nî akûmenya mathûgaanio jaaku. Agaakûrîyia kûringana na mathithio jaaku.

¹³Mwana waakwa no ûrîe nainchû nîûntû nî înjega, rûrua rwa kîgwaa kîa nainchû rûrî mûrîo.

¹⁴Ûu no u ûûme bûkari kîrî muntû ûrîa ûrî na bu, arî na wîrîgîîro bwa ûtûûro bwa nyumeene.

¹⁵Menya ûkabîra muntû ûmwagîru nja yaawe ûrîa barîa baaî bathithagia kana withûkîra nja yaawe,

¹⁶nîkwîthîrwa muntû ûmwagîru kinya akagitara mainda jang'ana, atîgûûjaga buru. Îndî muntû ûmûûî akiindagwa nî ûthûûku buru.

¹⁷Menya ûgwîrua woona mûnthû waaku agiitara kana ûkena woona atonya thîînene,

¹⁸MWATHANI atîkeeje kwona ûntû bûu athûûra atigana na kûmûkanûkia.

¹⁹Menya ûkîra barîa baaî kana ûcwaa gûkara tabo,

²⁰nîkwîthîrwa mwîyia atî wîrîgîîro bwa nyumeene; na ûtûûro bwaawe nî ta taa yooretue.

²¹Mwana waakwa, athîkagîra MWATHANI na mûnene, na ûgákara ta ndemi îrîa îtîbaathîkagîra;

²²tontû bobaîrî boomba kûreeta îkanûkia ntûti, nûû ûûmba kûmenya nî îkanûkia rîa mûthemba jûrîkû bakareeta?

²³Iji ithingatîte kinya cio nî njuno cia antû baboome. Gûtîagîrîte kwendeera antû bamwe ûkîgiita îgamba.

²⁴Muntû ûrîa wîraga muntû ûmûthûûku, “Ûtî na maatia”, muntû ûu arumagwa nî antû na akathûûrwa nî mîgongo.

²⁵Îndî agambi barîa bakanûkagia muntû ûrî na maatia nî bonaga mawega na bakaingîîrwa nî itharimo.

²⁶Îcokio rîrî na ûûma nî rîreetaga ûcoore.

²⁷Amba ûthuranîre mantû ja oome na ûrîme miuunda yaaku mbere ya gwaka nja.

²⁸Menya ûkûjîîra mûtûûri waaku mantû ja ûrongo kana waria ûrongo.

²⁹Ûkorouga atî, “Nkaamûthithîria ûrîa anthithîrîtie nkairîîria mûthithîrie ûrîa anthithîrîtie.”

³⁰Ndaakûrûkîîrîte muundeene jwa kîthao; muundeene jwa mîzabibû jwa muntû ûmûriitu.

³¹Naju rî, jwojûri matî ja miigua, na jwakunîkwa nî mûthûûnkî. Naru rûthingo rwaju nî rwamomokangi.

³²Naani ndoona mantû jau nî ndaathûgaanîrie bwaajo na ndîrairitana kuumania najo.

³³ Ûkëeja kûmenyeria gatoro na kûmamamamaga, ûnogoki ûtîkûringithia ngûgî,

³⁴ûkîa bûgaakwithûkîra ta mwamba ûrîe thîîna ta muntû ûmûtae.