Read KIMERU BIBLE PROTESTANT EDITION Njun 25 Bible Online

Njun 25 - KIMERU BIBLE PROTESTANT EDITION bible

Njun 25

¹Njuno iji kinya cio nî cia Solomoni, nacio ciothûranîrue na iraandîkwa nî tûrani twa Hezekia, mûnene wa Juda.

²Mûrungu eekagîîrwa nîûntû bwa mantû jarîa aithîte, nabo anene bageekîîrwa nîûntû bwa mantû jarîa boonanagia.

³Kûrî inya mono kûmenya mathûgaanio ja mûnene nîûntû jarî kûraaja mono na ja antû bangî o ta ûrîa îgûrû rîrî kûraaja na nthîgûrû.

⁴Athûranaga mûthetu na fetha nîkenda mûturi oona gîa kûthithagia into nakîo.

⁵Ebaebanîria mûnene na antû babaaî, nabu waathani bwaawe bûkagîra.

⁶ Ûgaaciimbaimbagia mbere ya mûnene, kana ûcionanagia ta ûrî muntû ûmûnene.

⁷Tontû nî kaaba gwikua gîtîîne gîkînenanene nkûrûki ya kûritwa gîtîîne, muntû ûngî agîkarîra.

⁸Ûkámatûkanga kûthitanga muntû ûngî, nîûntû bwa ûntû bûrîa woona arî nabu, nîûntû akëeja gwiteteera akoonania ûntû bûu tî bwa mma, nîgwe ûcokerwa nî nthao.

⁹Waateta na mûtûûri waaku, îka mantû jau jarî witho, nîûntû weeta ûkîaragia,

¹⁰barîa bakajaigua boomba gûgûcambithia na riîtwa rîaaku rîgeeta na mbere kûthûûka.

¹¹Kiugo gîkîega kîarîtue rîrîa rîagîrîte gîkari ta mbicha cia matuunda ja thaabu igemetie thaani ya fetha.

¹²Ûntû bûrîa muntû ûmûûme akanagia muntû akaigua bûkari ta kîmata kîa thaabu kana gîntû kîa goro gîa kwigemia nakîo.

¹³Mûtûmwa mwîtîkua atûmaga barîa bamûtûmîte baiigua bwega ta ûrîa tûûjî twa mpio tûringaga nyoonta îgiita rîa maketha rîrîa kwarîte.

¹⁴Muntû ûrîa ûtindaga gwikumia atî akaeejana kîewa na atîeejane, akari ta matu na ruuo rûtî ngai.

¹⁵Kwaria na ûboreri no gûtûme mûnene ageetîkîîria ûrîa ûkuuga; kanyua gakeega no gatûme mantû jarî na inya jombîka.

¹⁶Ûkëeja kwona nainchû, rîa îng'anîîrîte, warîa înyiingî mono, no gûtaîka ûgaataîka.

¹⁷Menya wîtaga kwa mûtûûri waaku rîonthe, atîkeeje kûnoga nîgwe akûthûûra.

¹⁸Kûrita ûkûûjî bwa ûrongo ûkîthûûkia muntû ûngî, nî ta kûmûringa na nchûgûma kana kûmûtema na rûchiû kana kûmûratha na mûgwî.

¹⁹Gwîka wîrîgîîro kîrî muntû ûtî mwîtîkua îgiita rîa thîîna, nî ta kûrîa irio na îîgo rîajîtue kana gwîta na kûgûrû kweneetie.

²⁰Kwinîra muntû withikîîrîte nî ta kûmûrita nguû îgiita rîa mpio kana kûmwîkîra chumbî kîrondeene.

²¹ Mûnthû waaku ëethîrwa arî na mpara mûrûmie biakûrîa, na eethîrwa arî na nyoonta mûkundie biakûnyua.

²²Wathithia ûu, ûgaatûma mûnthû waaku acokerwa nî nthao, nawe MWATHANI agaakûrîaa.

²³O ta ûrîa ruuo rûrîa ruumaga bwa ûrîo rûreetaga ngai, no u nguutû ireetaga rûmena kîrî antû.

²⁴Nî kaaba kûraara rûgitoone rwa nyomba antû a kûraara nyomba îmwe na mûka wa mateta.

²⁵Nteto injega kuuma nthîgûrû ya kûraaja nî ta rûûjî rwa mpio kîrî muntû ûrî na nyoonta.

²⁶Muntû ûmwagîru ûrîa ûrekagîîria antû babathûûku bathithia ûrîa bakwenda akari ta kîthima gîkunîtue.

²⁷O ta ûrîa bûtî bûbwega kûrîa nainchû înyiingî no ta u bûtî bûbwega gûcwaa mono gwîkîîrwa nî antû.

²⁸Muntû ûtîkûûmba gwikania ûntû akari ta ntûûra îkobori rûthingo yatigwa werûûne.