Read KIMERU BIBLE PROTESTANT EDITION Njun 26 Bible Online

Njun 26 - KIMERU BIBLE PROTESTANT EDITION bible

Njun 26

¹O ta ûrîa nkamia îtîonoraga thaano kana ngai yura îgiita rîa maketha nîu kîaa gîtîbuîri kûewa gîtîîo.

²O ta ûrîa gacîncîgîrî kana mûgûrû ibuurûkaga itîgûkirîîria amwe, nîu kîrumi gîtî na gîtûmi gîtîûmba kûgwata muntû.

³Mbarathi yathagwa na kîboko, ntigiri îkaathwa na mûkanda jwa nyiûrû nakîo kîaa kîathagwa na mûthanju.

⁴Menya ûcokia kîûria kîûrîtue na waa ûtîkeeje gûkara ta kîaa kinya gwe.

⁵Kîûria kîa waa gîcokagua ûrîa gîkari, kîaa gîtîkeeje gûciona ta kîûmîi.

⁶Gûtûma kîaa gîîta gwikia ntûmwa nî ûmwe na kwigiita magûrû kana kûnyua ûrogi.

⁷Ûkëethîrwa kîonje no gîîte na magûrû jaakîo jamoonju, kinya kîaa no kîarie na njuno.

⁸Kwaa kîaa gîtîîo no ûmwe na kwogeera iiga gîkûtheene.

⁹Kîaa gîkîgeria gûtumîra njuno rwarieene rwaakîo, nî ta muntû wogiti akîgeria kwirita mwigua njareene.

¹⁰Muntû ûrîa weejaga kîaa o kîrîa aroona ngûgî, akari ta mûthoogi ûrîa ûrathaga atîkûmenya kîrîa akûratha.

¹¹ Muntû ûrîa ûcokagîra mantû ja waa akari ta kurû îrîa îtaîkaga îgacoka kûrîa mataîka jaayo.

¹²Kûrî na wîrîgîîro kîrî kîaa nkûrûki ya muntû ûrîa ûcionaga arî ûmûûme, îndî arî kîaa.

¹³Mûthao aigwatagia akiugaga atî, “Kûrî na ngatûnyi oome! Ngatûnyi îrî njîreene!”

¹⁴Mûthao akaraga akîgarûkaga gîtandeene ta mûrango jûkîgarûka biûmeene.

¹⁵Mûthao no aikie njara thaaniine ya irio, îndî akanoga mbere ya abiîkîra kanyua.

¹⁶Mûthao acionaga arî ûmûûme nkûrûki ya antû babaingî barîa bacokagia biûria bwega.

¹⁷Muntû ûrîa ûtonyagîîra mateta jaitha, akari ta muntû ûrîa ûtirimanaga na kurû njîreene akamîgwata matû.

¹⁸O ta ûrîa muntû wa nthû aceethaga na inyinga bia mwanki na kûgera mîgwî ya ûbai,

¹⁹nîu muntû akari ûrîa waîîragia muntû ûngî agacoka kûmwîra “Ka ngûceethaga.”

²⁰O ta ûrîa mwanki jwooraga jwaaga nkû, nîu mateta jathiraga arîa gûtî na nguutû.

²¹O ta ûrîa makara kana nkû bitumagîrwa gwakia mwanki, nîu muntû ûrîa uunjagîîra bangî arwithanagia antû.

²²Rûguutû rwendi ta biakûrîa bibithongi, gûtî we ûtîendaga kûrwigua.

²³Muntû ûrîa waragia nteto injega îndî arî na ûthûûku nkoroone, nî ûmwe na nyongû ya yûmba yeereretue na fetha.

²⁴Muntû ûmûthûûku aithanagia ûthûûku bwaawe na rwaria rûrwega na aijî bûrîa bûrî nkoroone yaawe.

²⁵Kinya akaaria bûbwega atîa ûkámwîtîkia, nîûntû oojûri ûthûûku.

²⁶Kinya akageria kwithania ûthûûku bwaawe, no bûkaumîra bwonwe nî antû.

²⁷Muntû ûrîa wînjagîra ûngî îrinya, agûûjaga ku wengwa, na ûrîa wingiritagîria ûngî iiga nîwe wingiritagîrwa nîrîo.

²⁸Ûtîûmba kwayia muntû ûtîmûthwîre; naku gûkaathîrîîria muntû kwa ûrongo nî kûreetaga thîîna.