Read KIMERU BIBLE PROTESTANT EDITION Njun 27 Bible Online

Njun 27 - KIMERU BIBLE PROTESTANT EDITION bible

Njun 27

¹ Ûkorweja gwikumia nîûntû bwa mantû jarîa ûkaathithia rûûjû nîûntû ûtiijî ûrîa gûgakara rûûjû.

²Menya wigonga wengwa, reka antû bangî bakûgonge.

³Kûthangwa nî kîaa nî gûkûrito nkûrûki ya iiga kana mûthanga.

⁴Mûthûûro nî jûmûthûûku na marûrû nî jamaaî, îndî rûriitho gûtî muntû wa kûrûûmîîria.

⁵Nî kaaba gûtetua werûûne, antû a kwendwa na witho.

⁶Mûcoore kinya agakûringa atîîthagîrwa arî na ûthûûku, îndî mûnthû agagûcûnca imenyeere kûrî na ûgwati.

⁷Muntû akanyira atîenda kinya nainchû îndî muntû ûrî na mpara, kinya gîntû kîrî ng'ana kîrî mûrîo.

⁸Muntû ûrîa wîrûkagîra nja yaawe akari ta nyoni îrîa îîrûkagîra gîtara kîaayo.

⁹Maguta na marashi nî bigwîragia nkoro, îndî mathûgaanio jathangîkagua nî mîthangîko.

¹⁰Ûkórîrua nî acoore baaku kana acoore ba aciari baaku. Menya ûmatûkaga nja yeenu magiita jonthe gûteethua ûrî na thîîna Nî kaaba mûtûûri ûrî akuî naagwe nkûrûki ya mûtaana wa nyakwe arî kûraaja naagwe.

¹¹Mûtaana waakwa, gîa ûûme nabu bûu bûkaangwîria, na mbone bwa gûcokeria barîa bakûmenaga.

¹²Muntû ûmûûme oonaga ûgwati bwîjîte akabwebera, îndî kîaa gîîtaga mwanka gîgaitonyithia thîîneene.

¹³Jûkagia nguû ya muntû ûrîa ûrûngamagîîra îrandû rîa muntû atiijî, ûmîîkage mwanka rîrîa akarîaa îrandû rîa mûgeni ûu.

¹⁴Muntû ûrîa ûrookaga rûkîîrî kainda kwîra antû bookîîre barî toroone, akaraga ta akûbaruma.

¹⁵Mûka ûrîa ûtetaga rîonthe akari ta ngai îkuura mûthenya junthe.

¹⁶Kûgeria kûmûkiria nî ûmwe na kûgwata ruuo kana kûgwata maguta ja kûnyuurûka na nkuundi.

¹⁷O ta ûrîa chuuma inooraga chuuma îngî, nîu muntû aritanagwa nî antû bangî.

¹⁸O ta ûrîa mûrîmi wa mîkûû arîjaga nkûû ciaaju, nîu muntû ûrîa ûmenyagîîra mwathi waawe aeejagwa gîtîîo.

¹⁹O ta ûrîa muntû ategaga rûûjîîne akoona ûthiû bwaawe, nîu mathûgaanio ja muntû joonanagia ûrîa akari.

²⁰O ta ûrîa gwa akuû gûtîng'anagia akuû, nîu meetho jatîng'anagia kwona.

²¹Fetha na thaabu bitheragua nî mwanki; muntû nawe amenyekaga ûrîa akari kuumania na nkuma yaawe.

²²Kinya ûgatetia kîaa gîkainya ta ûrîa mpempe ciûûragwa na ntîrî, waa bwaakîo bûtîthira.

²³Menyagîîra ndîîthia ciaaku; cia mbûri na ng'ondu na ng'ombe,

²⁴nîûntû ûtonga bûtîtûûraga, na kinya waathani bûtîtûûraga mwanka kenya.

²⁵Rîrîa nyaki yaathira, îngî îgîkinya kuuma, tuujaga îria irîmeene.

²⁶Nacio ng'ondu îgakwonagîra nguû, na weendia mbûri igakwonera mbeecha cia kûgûra ithaka.

²⁷Ningî mbûri ciaaku igaakamagwa îria rîa gûkûng'ana amwe na nja yaaku, na kinya rîa kûnyuuwa nî nthûûmba ciaaku cia aka.