Read KIMERU BIBLE PROTESTANT EDITION Njun 28 Bible Online

Njun 28 - KIMERU BIBLE PROTESTANT EDITION bible

Njun 28

¹Antû babaaî bamatûkaga gûtî we ûbeengîte, îndî antû babaagîru bomîîrîtie ta ngatûnyi.

²Nthîgûrû ya antû ndemi yaathagwa nî athani babaingî. Îndî nthîgûrû ya antû baboome na barî kîrîra, îkaraga kindaajî îgiita rîrîraaja.

³Mûnene ûrîa winyagîîria nkîa nî ta ngai îrîa îkondoragia imera gûkagîa mpara.

⁴Antû barîa batîthingataga waatho, nîka beekagîra barîa baaî inya, îndî barîa baathîkagîra waatho, nî ta kûrwaa barûjaga na barîa baaî.

⁵Antû babaaî batiijî mma nîmbi, îndî barîa bathingataga MWATHANI nî baijî bwega mma nîmbi.

⁶Nî kaaba nkîa îrî na mîîtîre îmîega, nkûrûki ya gîtonga kîrî na mîîtîre îmîthûûku.

⁷Mwana ûrîa ûthingataga jarîa aritani nî ûmûûme; îndî ûrîa ûriûnganagia na antû ba ûtheri nîka eekîrithagia îthe nthao.

⁸Muntû ûrîa wongagîîra ûtonga bwaawe na njîra ya gûkoobithania nîkenda oona mpongeeri, oothûranagîria muntû ûrîa wigagîîrua nkîa kîaao ûtonga bûu.

⁹Muntû ûrîa ûtîathîkagîra maathana, kinya maromba jaawe nî jamatengûre.

¹⁰Muntû ûrîa ûtûmaga muntû ûmwagîru atonya maatieene, akagwa kinya maatieene jau wengwa; îndî muntû ûrîa ûtî îgi akoona kiigai gîkîega.

¹¹Gîtonga gîcionaga kîûmîi mantûûne jaakîo îndî nkîa îciûki yagîtega nî îmenyaga mantû jaakîo mono.

¹²Nî kwîthagîrwa kûrî na ûkumio na gîkeno rîrîa atongeeria babaagîru bakwaathana, Îndî antû beetaga gwiciitha rîrîa antû babaaî bajûkia waathani.

¹³Muntû ûrîa withanagia maatia jaawe atîtûûra bwega, Îndî muntû ûrîa umbûraga meeyia agatigana najo, Mûrungu nî amwigagîîrua kîaao.

¹⁴Kîtharimo nî kîrî muntû ûrîa wathîkagîra MWATHANI magiita jonthe; Îndî muntû ûrîa ûûmagia nkoro yaawe no kûthira akathira.

¹⁵Mûnene ûrîa winyagîîria nkîa akari ta ngatûnyi îkûruuma kana ndûû îgûcwaa gîa kûrîa.

¹⁶Mûtongeeria ûtî na ûûme athanaga akiinyagîîria bangî na ûng'entu; îndî mûtongeeria ûrîa ûtîendaga waayia aathanaga îgiita rîrîraaja.

¹⁷Muntû ûrîa ûûraganîte agatûûra athînîte nkoro, na amatûkîte mwanka rîrîa agakua. Muntû ta ûu atîbuîri gûteethua.

¹⁸Muntû ûrîa ûrî mîîtîre îmîega atûûraga kiindajî îndî muntû ûrîa ûrî mîîtîre îmîthûûku atonyaga thîîneene ntûti.

¹⁹Muntû ûrîa ûrîmaga akethaga irio bibingî, îndî muntû ûrîa ûtindagîra ngûgî cia ûtheri akaathîîna.

²⁰Muntû mwîtîkua atûûraga ûtûûro bûbwega, îndî ûrîa ûcwaga ûtonga bwa mpwîî agakanûkua.

²¹Tî bûbwega kûgiitîra muntû îgamba ûkîmwendagîîra, muntû oomba kûgiita îgamba bûbûûî nîûntû bwa kûrûmua gantû.

²²Muntû wa ngoga acwaga ûtonga akî, na atîmenyaga ûkîa bwoomba kûmwîjîîra.

²³Muntû ûrîa ûkaanagia muntû ûngî mantû, muntû ûu nî acokaga kwendwa nî muntû ûu nkûrûki ya muntû ûrîa ûmûkaathaga akî.

²⁴Muntû ûrîa wiyaga into bia îthe kana ng'ina akîthûgaanagia bûu tî wamba, atî mwanya na aamba bangî.

²⁵Aciendi bacwagîra bangî thîîna, barîa beetîkîtie MWATHANI bakaatharimwa.

²⁶Nî waa gûciîra atî nî wenka ûkûmenya, îndî muntû ûrîa ûthingataga kîrîra kîa barîa boome atîonaga ûgwati.

²⁷Muntû ûrîa ûteethagia nkîa atîrîîjagwa nî thîîna; îndî muntû ûrîa ûtîteethanagia arumagwa nî babaingî.

²⁸Rîrîa antû babaaî bakwaathana, antû nîka bamatûkaga waathani bwaao bwathira, antû babaagîru nî baathanaga kaîrî.