Read KIMERU BIBLE PROTESTANT EDITION Njun 29 Bible Online

Njun 29 - KIMERU BIBLE PROTESTANT EDITION bible

Njun 29

¹Ûkoona muntû akanua ûntû magiita jamaingî atîkwigua, eejaga gûtonya thîîneene atîûmba gûteetheka.

²Rîrîa antû babeega bakwaathana antû nî bagwîragua, îndî rîrîa barîa baaî bakwaathana antû nî barîîjaga thîîna.

³Mûtaana ûrîa weendaga kwathwa kîrîra nî agwîragia aciari baawe, îndî mûcoore wa amaraya athiragîria into biaawe kîrî bo.

⁴Mûnene ûrîa weendeete mantû ja îota nî atûmaga mûgongo jwaawe jûgîa inya; îndî mûnene ûrîa weendeete nkukumo nî athûûkagia nthîgûrû yaawe.

⁵Muntû ûrîa ûgongaga muntû ûtîagîrîte kûgongwa nîka amûtemagîra njîra ya kûûra.

⁶Muntû ûmûûî athiragua nî meeyia jaawe, îndî muntû ûmwagîru akaraga agwîrîîtue.

⁷Muntû ûmwagîru nî amenyagîîra kûthithîria nkîa mantû ja mma, îndî muntû ûmûthûûku atîtindanagîra na mantû ta jau.

⁸Antû ba tengûri bamuuntagia ntûûra mwanki îndî barîa boome nî bareetaga thîîrî.

⁹Rîrîa muntû ûmûûme akûgambana na kîaa kîaa no kûtheka kîthekaga, gîkîrumanaga na kûringîra antû gîtuma.

¹⁰Ooragani nî bathwîre muntû ûtî îgi, bagacwaa ûrîa bamûûraga.

¹¹Kîaa kîathûûra gîtûrîkagia mûthûûro buru, îndî muntû ûmûûme nî aigwataga athûûra

¹²Mûtongeeria ûrîa ûthikagîîra ûrongo rîrîa akwaathana, barîa atongeeretie bakaa arongo.

¹³Nkîa na barîa bainyagîîria nkîa bang'ananîtue nî ûntû bûmwe: bonthe baeejagwa weerû nî MWATHANI.

¹⁴Mûnene ûrîa ûgiitagîra nkîa îgamba na njîra îrîa yagîîrîte, waathani bwaawe nî bûtûûraga bûrî kindaajî îgiita rîrîraaja.

¹⁵Gûkanûkia mwana ûntû nî gûtûmaga akagîa ûûme, îndî mwana ûtîkanûkagua, nî areetagîra ng'ina nthao.

¹⁶Rîrîa antû babaaî bakwaathana, meeyia nî joongeerekaga, îndî antû babaagîru batûûraga mwanka bakoona bau baaî bakîthira.

¹⁷Ritana mwana waaku mîîtîre îmîega naagwe ûkoona thîîrî ûkarage ûgwîrîîtue,

¹⁸Arîa MWATHANI atiijîkeene waatho bûtîathîkagîrwa, îndî kîtharimo nî kîrî barîa bathikagîîra Waatho.

¹⁹Nthûûmba îtîathîka na biugo akî; nîûntû kinya îkamenya ûrîa ûkwenda, atîthithia u.

²⁰Kûrî na wîrîgîîro kîrî kîaa nkûrûki ya muntû ûrîa waaragia nteto atîambîte kûthûgaania.

²¹Wanaania nkombo yaaku kuuma waaneene bwaayo, mûthieene îkeenda kiigai.

²²Muntû wa mûthûûro nî areetagîîra antû mateta, na muntû wa marûrû nî atonyaga meeyiene.

²³Wikumia bwa muntû nîbu bûûraga nawe, îndî muntû ûrîa winyiagia nî oonaga îgweta.

²⁴Muntû ûrîa ûteethagia mwamba kwiya nîka aithwîre wengwa; kinya akanyuithua muuma gûtî u aumbûra.

²⁵Ûgátonya mûtegoone jwa gûkîraga antû bangî îndî weetîkia MWATHANI ûgaatûûraga kiindajî.

²⁶Antû babaingî nî baciendithagia kîrî mûtongeeria; îndî îota riumaga kîrî MWATHANI.

²⁷Antû babaagîru nî bathwîre barîa baai, na barîa baaî nî bathwîre barîa baagîru.