Read KIMERU BIBLE PROTESTANT EDITION Njun 3 Bible Online

Njun 3 - KIMERU BIBLE PROTESTANT EDITION bible

Njun 3

¹Mwana waakwa, ûkórîrua nî mooritani jaakwa, îndî nî jakarage nkoroone yaaku magiita jonthe.

²Najo jagaatûma ûthinyaare na ûtûûre ûtûûro bûbûraaja.

³Ûgátiga kwiganîîrua kîaao na kwaa mwîtîkua; mantû jau jaogeere nkingo na ûjaandîke nkoroone.

⁴ Wathithia ûu ûkagîa gîtîîo na na wendwe nî Mûrungu na antû.

⁵Îtîkia MWATHANI na nkoro yaaku yonthe, na ûkéerîgîîra gûteethua nî ûûme bwaaku akî.

⁶Mantûûne jaaku jonthe îkaga MWATHANI mbere, nawe akaathongomagia mîîtîre yaaku.

⁷ Menya ûcionaga ûrî ûmûûme, athîkagîra MWATHANI na ûreganage na mantû jamathûûku.

⁸Kûthithia ûu nîku mûtheega jwa mwîrî jwaaku, na nîyo inya ya maîndîîndî jaaku.

⁹Kumagia MWATHANI na into biaaku ûmûkaathage na maketha ja mbere ja imera biaaku bionthe.

¹⁰Nacio nchuku ciaaku ikoojûra irio bibingî, na ithiri biaaku bikaunîkaraga ndibei.

¹¹ Mwana waakwa, ûkáthûûra îkanûkia rîa MWATHANI kana ûnoga nî kwigua jarîa agûgûkania.

¹² Nîkwîthîrwa MWATHANI akanûkagia muntû ûrîa eendeete, o ta ûrîa muntû akanûkagia mwana waawe ûrîa eendeete.

¹³Kaaba muntû ûrîa ûcwaga ûûme, ûrîa ûgîîjaga kîrîra,

¹⁴nîkwîthîrwa ûrî na biu kûrî umithio nkûrûki ya kwîthîrwa ûrî na fetha na nî bia goro nkûrûki ya thaabu.

¹⁵Ûûme bûrî bata nkûrûki ya maiga ja goro, na gûtîkîo kîa birîa wendekia kîûmba kûng'ananua nabu.

¹⁶Ûûme bweejanaga ûtûûro bûbûraaja, na ningî bûkaeejana ûtonga na îgweta.

¹⁷Ûûme nî bûreetaga mantû jameega bûkareeta thîîrî mantûûne jonthe.

¹⁸Ûûme nî ta mûtî jwa mwoyo kîrî barîa barî nabu, barîa baigwatîrîte bu barî munya.

¹⁹MWATHANI oombîre nthîgûrû na ûûme bwaawe, na areeka îgûrû arîa rîrî na ûmenyo bwaawe.

²⁰Ûûme bwaawe nîbu bwaatûmîre mîuro yuuma nthî, na matu jaurithia ngai.

²¹Mwana waakwa, karaga na kîrîra na ûûme na ûkórîrua nîbio.

²²Nîbio bigaagwîkagîra inya ûtûûroone bwaaku na bikûthongomagie ta mûkathî jûrî nkingo.

²³Ûgaatûûra kiindajî ûtûûroone bwaaku na ûtîkorogiitara.

²⁴Ûgîîta kûmama ûtîîthagîrwa ûgîkîraga na wamama, ûkaamamaga toro înjega ûtukû bunthe.

²⁵Gwe ûkámaka mathîîna jakwîjîîra ntûti kana woona barîa baaî bakîthirua.

²⁶Tontû MWATHANI agaagûkaragia, ûtîkeeje kûgwa mûtegoone.

²⁷Teethagia barîa barî na ûbatu, rîrîa rîonthe ûkûûmba.

²⁸Ûkéera mûtûûri waaku eejîre gîntû rûûnene, këethîra woomba kûmwaa kîo ntukû o îîu agûkîenda.

²⁹Ûkábangîra mûtûûri waaku ûrîa ûkaraga agwîtîkîtie, ûntû bûbûthûûku.

³⁰Ûgátetia muntû ûtheri atîkûthithîrîtie ûthûûku.

³¹Ûkáirîrîîria gûkara ta muntû wa thanga na ûkáthuura no bûmwe bwa jarîa athithagia.

³²Nîkwîthîrwa MWATHANI nî athwîre antû ngîti Îndî we nî atumaga ûcoore na barîa baagîru.

³³Kîrumi kîa MWATHANI nî kîgwataga mûciî jwa barîa bathithagia ûthûûku; Îndî MWATHANI nî atharimaga mîciî ya barîa baagîru.

³⁴ MWATHANI nî ameneete aikumia îndî nî aigagîîrua barîa bainyiagia kîaao.

³⁵Gîtîîo nîkîo gîkaa kiigai gîa antû barîa boome nacio nthao ciee kiigai kîa biaa.