Read KIMERU BIBLE PROTESTANT EDITION Njun 30 Bible Online

Njun 30 - KIMERU BIBLE PROTESTANT EDITION bible

Njun 30

¹Iji nîcio nteto cia Aguri, mûtaana wa Jake. “Mûrungu nî antiganîrîtie, Mûrungu nî antiganîrîtie ntî na inya buru.

²Ûûni nî ni mûriitu nkûrûki ya antû bonthe ni ntiijî mantû jarîa antû bangî baijî.

³Ni ntaaritanwa mantû ja ûûme, kana menya mantû ja Mûrungu.

⁴Nûû waitia îgûrû na aracoka kaîrî nthîgûrû? Nûû wakumbatîria ruuo na nkuundi? Nûû wakûnja rûûjî na nguû? Nûû weekîîre mîanka ya nthîgûrû? Eetagwa atîa? A mûtaana waawe eetagwa atîa?

⁵Mantû jonthe jarîa Mûrungu aaragia nî ja mma; nî rong'o ya barîa baiciithaga kîrî we.

⁶Ûkóngeera mantû jaaku kîrî jaawe, atîkeeje kwoonania ûrî mûrongo agûkanûkîria jo.”

⁷Mantû jaîrî akî nîjo ngûkûromba itû MWATHANI na ûkaarega kûmbûjûrîria jo mbere ya nkua.

⁸Ûmpebanie buru na waayia na ûrongo; ûgámpingîîria ûkîa kana ûmpingîîria ûtonga. Mpeejaga biakûrîa bia kûng'ana;

⁹ntîkeeje kûnyira mono, mbûrîrua nîgwe ngîciûragia, “Mûrungu nûû we kîrî ni?” Kana nthîîna mono mpaa mwamba, mbîkîrithia riîtwa rîa Mûrungu waakwa nthao.

¹⁰Ûkoroguuta nthûûmba kîrî mwathi waayo, îtîkeeje gûkûruma na kîrumi gîkugwata.

¹¹Kûrî antû bamwe barumaga beethe, na batîkagîîra kinya ba ng'ina.

¹²Kûrî antû bamwe bacionaga barî babatheru; îndî batîthereetue ûthûûku.

¹³Kûrî antû bamwe bacionaga barî babeega mono; nabo nî baikumîtie mono.

¹⁴Kûrî bangî banoorereete nkîa maîgo nîkenda baithiria.

¹⁵Kîgûûmba kîaarî na aarî baîrî; na bobaîrî baugaga, “Nenkera, nenkera.” Kûrî na into bingî birîa bitîng'anagîrwa; na bingî birîa bitîkorouga, “Ndîkûng'ania.”

¹⁶Nabio nî: gwa akuû, na mûka nthata, na nthîgûrû înyoontu îtî rûûjî na mwanki jûrîa jûtîng'anagia gwakana.

¹⁷Muntû ûrîa ûtegaga îthe bûbûthûûku kana akameneeria ng'ina abwuîrîte gûtûrangwa meetho nî nkûngûrû kana akarîîwa nî nderi.

¹⁸Kûrî mantû jarîa jaandigaragia mono na jangî ntîûmba gûciûra.

¹⁹Najo nî: ûrîa rwîgî rûburûkagîîra îgûrû, na ûrîa njoka îîtagîîra iigeene, na ûrîa gîtarû kîûmbaga gwîtîîra îrieene na ûrîa mûka na ntûmûrûme beendanaga.

²⁰Mûka mûthûngîîri athiria kûthûngîîra, Athambaga akauga atîrî, “Gûtî ûthûûkû ndîrathithia.”

²¹Kûrî na mantû jamwe jatûmaga nthîgûrû iinaina na jangî jatûmaga nthîgûrû îremwa gûkarîka.

²²Najo nî: nkombo îkaa mûnene, kana kîaa kîrî na biakûrîa bibingî,

²³kana mûka ûthwîrwe nî antû akwona wa kûmûgûra, kana nthûûmba ya mwarî îkûgûrwa nî mwathi waayo antû-a mwekûrû mwene nja.

²⁴Kûrî na tûnyomoo nthîgûrûûne tûniini, îndî tûrî ûûme bûbwingî mono:

²⁵Nthingiiri itî inya, îndî nî ciîkaga biakûrîa thaano;

²⁶Ithûri bitî inya, îndî nî biakaga ikaro biaabio maigeene;

²⁷Ngigî itî mûnene, îndî ithingatanaga ta njûûrî ya ndwaa.

²⁸Mîûrûûrû ûûmba kûgwata na njara, no îîthîrwe îrî gîkaroone kîa mûnene.

²⁹Kûrî biûmbe bimwe birî riri rîrîa biîtîte, na bingî biîtîte birî mwago:

³⁰Ngatûnyi irîa irî inya nkûrûki ya nyamû cionthe na itîkîraga nyamû noo îrîkû.

³¹Nchamba ya ngûkû ikiindîte, na nthenge, na mûnene akûrûkîrîîte mbere ya antû barîa aathaga.

³²Këethîra ûraikumagia ûgîciîraga ûtî kîaa, kana ûrathûgaanagia kûthithia ûthûûku, amba ûkire na ûthûgaanie bwega.

³³Nîkwîthîrwa o ta ûrîa wathuka îria riumaga maguta, na waringa nyiûrû yumaga tharike, nîu kuujîîra antû ba marûrû gûtûmaga barwaa.