Read KIMERU BIBLE PROTESTANT EDITION Njun 31 Bible Online

Njun 31 - KIMERU BIBLE PROTESTANT EDITION bible

Njun 31

¹Iji nîcio nteto irîa mûnene Lemueli eerîrwe nî ng'ina.

²Itû mûtaana waakwa, ndaaerwe gwe nyuma ya kûromba, kiinda gûtû nkwîre.

³Ûkáthûûkia ûtûûro bwaaku na aka, aka baraathiria anene babaingî.

⁴Thikîîra bwega gwe Lemueli, anene batîbuîrîte kûnyoontera ndibei, kana atongeeria bamîkorokera.

⁵Batîkeeje kûnyua borîrua nî waatho bûrîa bwîîki na barega kûthithîria barîa barî na ûbatu ûrîa kwagîrîte.

⁶Ndibei îndûru îkundagua antû barîa barî akuî gûkua, na ndibei îgakundua antû barîa bakûthangîka mono.

⁷Antû ta bau bamînyunyaga bakoorîrua nî thîîna ciaao na mîthangîko yaao.

⁸Aaragîîria antû barîa batîkûûmba gûciarîrîîria, na ûmenyagîîre barîa batîgûciûmba nîkenda bathithagîrua mantû ja îota.

⁹Aragîîria na ûgambagîre antû na îota, na ûmenyagîîre nkîa na barîa barî na ûbatu ûbathithagîrie ûrîa kwagîrîte.

¹⁰Nîatîa kûrî inya kwona mwekûrû ûmwega? Mwekûrû ta ûu nî wa goro mono.

¹¹Mûkûrû waawe nî amwîtîkîtie mono, na gûtî rîo akaarîa ûkîa.

¹²Mwekûrû ta ûu athithagîria mûkûrû waawe mantû jameega ûtûûroone bwaawe bunthe.

¹³Mwekûrû ûu, acwaga guee na bamba, agatuma nguû.

¹⁴We athûgûraga into kuuma kûraja, akabireeta nja, o ta ûrîa meri cireetaga into kuuma kûraaja.

¹⁵Okagîîra rûkîîrî kainda akamaathîra nja yaawe, na akagaania ngûgî kîrî ariti ngûgî baawe.

¹⁶Athûgaanagîria kûgûra kîthaka, agakîgûra; into birîa oonaga aarita ngûgî nî abitumagîra kwaanda muunda jwa mîzabibû.

¹⁷Nî aritaga ngûgî mono, aritaga ngûgî ciaawe na inya na wîru.

¹⁸Mwekûrû ûu nî aijî ngûgî îrîa îrî na umithio nawe amîritaga mwanka ûtukû maindûkîra.

¹⁹Nî ookothaga ndigi, agatuma nacio nguû.

²⁰Ningî nî ateethagia nkîa, na barîa barî na ûbatu.

²¹Atigagua ûguaa rîrîa kûrî na mpio, nîkwîthîrwa nî eethagîrwa atumîrîte antû ba nja yaawe nguû cia mûruutîra.

²²Atumaga nguû cia kwara gitandeene, nawe eekagîra nguû inthongi cia rangi ya mûkû.

²³Mûkûrû waawe nî aeejagwa gîtîîo nî akûrû bangî ba ntûûra.

²⁴Mwekûrû ûu atumaga nguû inthongi amwe na mîcibi akabiendia kîrî abiashara.

²⁵Ningî arî inya na îgweta, na atîkîraga ûrîa gûgaakara nyumeene.

²⁶Aragia nteto cia ûûme irî na ûritani.

²⁷Nî aritaga ngûgî cia kûmenyeera nja yaawe na atî ûthao.

²⁸Aana ba mwekûrû ûu nî bamweejaga gîtîîo na kinya mûkûrû waawe akamûkumia, akamwîra atîrî,

²⁹“Kûrî na aka babeega babaingî îndî nîgwe mwega kîrî bonthe.”

³⁰Ûthongi bwa mûka nî bwaagia na nî bûthiraga, îndî mûka ûrîa wathîkagîra MWATHANI nî wa gwîkagîîrwa.

³¹Mwekûrû ta ûu nî aeejagwe gîtîîo nîûntû bwa ngûgî ciaawe na nî akumague nî antû bonthe.