Read KIMERU BIBLE PROTESTANT EDITION Njun 5 Bible Online

Njun 5 - KIMERU BIBLE PROTESTANT EDITION bible

Njun 5

¹Mwana waakwa, thikîîra nkwee kîrîra gîaakwa, kiinda gûtû wigue mataaro jaakwa.

²Nîkenda ûûmba gûciûraga mantû bwega na mantû jarîa ûkwaria joonania ûrî muntû ûrî na kîrîra.

³Nîkwîthîrwa mîromo ya mûka mûmaramari îrî mûrîo ta nainchû, na rwaria rwaawe rûteenderi ta maguta.

⁴Îndî mûthieene aeejaga gîntû kîrî ng'ana ta nyongo, na agakara ta rûchiû rûrîa rûtemaga na nteere ijîîrî.

⁵Athingataga njîra ya kaûrîro ageeta mwanka gîkuûne.

⁶We aregaga kûthingata njîra ya mwoyo na atîmenyaga akîûra.

⁷Tontû bûû, nandî, ataana baakwa, nthikîîreeni, na bûkaregana na ûrîa nkûbwîra.

⁸Îtagîîreeni kûraaja na mûka mûmaramari, na bûgéetîîra akuî na mwari jwa nyomba yaawe.

⁹Bûkárekeeria gîtîîo kîeenu kîaa kîa antû bangî, kana ûtûûro bweenu bûthûûkua nî antû batî kîaao.

¹⁰Kana ageni bëeja kûjûkia ûtonga bweenu na birîa bûritîrîte ngûgî bijûkua nî antû ba kuuma kûngî.

¹¹Ningî bûtîkéeje kûrîra mûthieene jwa ûtûûro bweenu, rîrîa mîîrî yeenu îkeethîrwa îthiri inya na îkoorûrûka,

¹²bûkiugaga atîrî, “Nîkî ûntû ndaaregere kwaathîka? Nîkî ûntû ndaaregaga kwigua ndakaanua mantû?

¹³Ntaathikagîîra aritani baakwa, kana mbigua mooritani jarîa ndaritanagwa.

¹⁴Naani ndî akuî kûthira buru, o ndî gatîgatî ga kîûthûrano.”

¹⁵Eejaga mwîtîkua kîrî mwekûrû waaku, na ûmwendage wenka.

¹⁶Ka ûbuîrîte kûnyagagia mbeeû yaaku gûntû kunthe, ûthiragîria inya yaaku njîreene?

¹⁷Nî kaaba kwirerera mbeeû yaaku gwengwa antû a kûrererwa nî akîrîîndî.

¹⁸Gwîragua nîûntû bwa mwekûrû waaku, o ta ûrîa wagwîragua nîwe bûrî babeethî.

¹⁹Aarî ûmwega na ûmûthongi ta nkûrûngû. Ûthongi bwaawe bûrogûkuucagîîria magiita jonthe; wendo bwaawe bûrokûgwîragia rîonthe.

²⁰Mwana waakwa, nîmbi îgûtûma ûkuucua nî mûka mûtaratari? Nîmbi îgûtûma wîtîkîîria ûkuucua nî mûka wa muntû ûngî?

²¹Nîkwîthîrwa MWATHANI nî oonaga ûrîa muntû akûthithia, na nî aijî mîîtîre yaawe yonthe.

²²Meeyia ja muntû ûmûthûûku nî mûtego kîrî we; na agwatagua nîju o akîthithagia meeyia.

²³Ateejagwa nî waa bwaawe agakua nîûntû bwa kûrega kwathîka.