Read KIMERU BIBLE PROTESTANT EDITION Njun 7 Bible Online

Njun 7 - KIMERU BIBLE PROTESTANT EDITION bible

Njun 7

¹Mwana waakwa, ririkanaga mantû jarîa nkwîraga na ûmenyagîîre mawaatho jaakwa.

²Thingataga mawaatho jaakwa naagwe ûgeeta mbere gûtûûra mwoyo, ûmenyagîîre ûritani bwaakwa ta kaana ka riitho.

³Jagwate ûjarikie ûjeeke nkoroone yaaku.

⁴Eendaga ûûme mono nkûrûki na weethagie kîrîra mûcoore waaku.

⁵Nabio bigaakwathûranaga na aka baitha na bikwaathûranage na mûka mûtaratari ûrîa ûrî nteto inthongi.

⁶Îgiita rîmwe nî ndaategeereete ndiricheene ya nyomba yaakwa,

⁷ndîroona nthaka biaa. Ûmwe waao aarî ûmûriitu mono.

⁸We aakûrûkîte na njîra yaarî akuî na nyomba ya mûka ûmwe, na aragwata kajîra ka gwîta kwa mûka ûu.

⁹Naku kwaarî koogoro kûrî na marwîrwî gûkîgîîjaga muundu.

¹⁰Kûrakara atîrî, mûka weekîrîte nguû ta maraya nî aatirimanîre nawe. Mûka ûu nî aarî na mîbango yaawe.

¹¹Mûka ûu nî ntûrîka na ataarikagia nthî kwaawe.

¹²Arî njîreene, arî thokoone; akaraga akabîrîte arûme ithioroone bia njîra.

¹³Rîu mûka ûu nî aamûgwatîre aramûcûnca, aramwîra oomîîrîtie atîrî,

¹⁴“Nî nditîte kîgongwana, na ndoojûria mîciîtio yaakwa naarua.

¹⁵Nkwîjîte gûgûcwa na nandî ndîgûkwona.

¹⁶Nî mbarîte gîtanda gîaakwa; nkîarîte chuka cia kuuma Misri cia rangi inthongi, itumi na ndigi cia bamba.

¹⁷Nî minyîrîte gîtanda marashi; marashi ja manemane, na ja udi, na ja ndalasini.

¹⁸Njû tûraare tûgwîrîrue wendo bweetû ûtukû bunthe.

¹⁹Mûkûrû waakwa atî nja, nîkwîthîrwa arî rûgendo rwa kûraaja.

²⁰Arajûkîrie mbeecha inyiingî, nawe agaakara biumia biîrî atîreeja.

²¹Mûka ûu arakuujîîria mûthaka ûu na nteto inthongi, aramûûmba na rwaria rwaawe rûrî nkanya.

²²Mûthaka aramûthingata o ntûti o ta ûrîa ndeegwa îthingataga mûthînji iikîtue kîthînjîroone, kana o ta nkûrûngû îkîgwatwa nî mûtego,

²³nao au nîo îrathagîrwa na mûgwî. Mûthaka ûu akari ta nyoni îmatûki gîtegiine atîkûmenya arî ûgwatiine.

²⁴Nandî rî, aana baakwa, nthikîîreeni bwigue ûrîa nkûbwîra.

²⁵Bûkáirîrîîria kûthithia mantû jarîa mûka ta ûu eendaga, bûmûthingata abwatithia njîra.

²⁶Mûka ta ûu nî athiragia antû babaingî na barîa bakuujaga nîûntû bwaawe nî kîrîndî gîkiingî.

²⁷Nyomba yaawe nî njîra ya kaûrîro njîra îrîa îîtaga gîkuûne.”