Read KIMERU BIBLE PROTESTANT EDITION Njun 8 Bible Online

Njun 8 - KIMERU BIBLE PROTESTANT EDITION bible

Njun 8

¹ Thikîîreeni Ûûme bûgîîtana, ûmenyo nî bûgwîtana na kajû.

²Ûûme nî bûrûngami ibariine akuî na njîra bûrûngami macemanîrio ja njîra.

³Bûrîîtana bûrî nteere cia mpingîro cia ntûûra, bûgeetana na kajû bûrî au mpingîroone bûkiugaga atîrî:

⁴“Îbuî antû nî nkûbwîta, nî nkûbwîta bwinthe na kajû gakanene.

⁵Buî barîa bûtîûmîi, iritaneeni, naabuî biaa, gîeni ûûme.

⁶Thikîîreeni mbwîre mantû ja bata, naani nkaabwîra mantû ja mma akî.

⁷Nîkwîthîrwa ûûni mbaragia nteto cia mma na nî nthwîre kwaria ûrongo.

⁸Nteto cionthe irîa mbaragia nî cia mma na tî cia waayia kana cia ûrongo.

⁹Muntû ûrîa ûrî ûûme nî aciûraga nteto iu na muntû ûrîa ûrî ûmenyo nî amenyaga nî cia mma.

¹⁰Thuura ûritani bwaakwa antû a fetha, na ûthuure kîrîra antû a thaabu îrîa njega buru.

¹¹Nîkwîthîrwa ûûme nî bûkûrûkîte twiga twa goro na gûtî gîntû noo kîmwe kîa birîa wendaga kîng'uananithua nabu.

¹²Ûûni, ûûme, ndî ûmûciûku na ndî kîrîra gîa kûmenya mantû.

¹³Gûkîra MWATHANI nî kûmena ûthûûku. Nî nthwîre rwikumio, na rambu, na mîîtîre îmîthûûku, na ûrongo.

¹⁴Ûûni, ûûme, ndî kîrîra na ûgambi na ndî ûmenyo na inya.

¹⁵Nî ni ntûmaga anene baathana, na atongeeria barita Waatho bûrîa bwagîrîte.

¹⁶Nî ni ntûmaga atongeeria baathana o amwe na athani bonthe ba nthî.

¹⁷Nî mpendeete barîa bampendeete, na barîa bancwaga na wîru nî bambonaga.

¹⁸Nî ni mpeejanaga ûtonga na îgweta, na nkaeejana ûthinyaari na ûûmbani.

¹⁹Kîrîa kiumanagia naani nî gîkûrûkîte thaabu îrîa nthongi, na kîrîa mpeejanaga gîkûrûkîte fetha îrîa nthongi buru.

²⁰Mbîtaga na mîtîre îmîagîru, nkathingata njîra cia îota.

²¹Nî ntongagia barîa bampendeete, na nkoojûria mîthithû yaao.

²² Rîrîa MWATHANI oombaga into karaaja, nî ni aambîrîîrie naani.

²³Ndoombîrwe o tene, kîambîrîriene buru, mbere ya nthîgûrû îtîrombwa.

²⁴Ndaarî o mbere ya îria rîgîa o, na kinya mbere ya ithima bitûrîka.

²⁵Nî ndaarî o mbere ya irîma biûmbwa na kinya mbere ya tûrîma twîthîrwa tûrî o.

²⁶Ndaarî o mbere ya Mûrungu oomba nthîgûrû na ithaka biaayo, na kinya mbere ya oomba mûthetu.

²⁷Agîîka îgûrû arîa rîrî, nî ndaarî o, na akîathûrana îgûrû na îria nî ndaarî o.

²⁸No ndaarî o agîîka matu îgûrû, na no ndaarî o agîtûra nthongo cia îria.

²⁹Rîrîa eekagîra mîanka ya îria, nîkenda rûûjî rûtîgaakûrûkage arîa arwîkîte, nî ndaarî o, na no ndaarî o rîrîa eekagîra mûsingi jwa nthî.

³⁰Rîu nî ndaarî amwe nawe ta mwaki. Naani nî ndaamûgwîragia ntukû cionthe nîûntû nî ndaarî amwe nawe.

³¹Nî ndaagwîragua nîûntû bwa nthîgûrû yaawe, na nkagwîrua nîûntû bwa antû barîa batwîre kû.

³²Rîu aana baakwa, thikîîreeni ûrîa nkûbwîra; nî kaaba barîa bonthe bamenyagîîra mantû jarîa mbeeraga.

³³Igueni ûritani bwaakwa bûûmîe, na bûkáregana nabu.

³⁴Nî kaaba muntû ûrîa ûmbigagua, ûrîa ûtindaga mpingîroone ciaakwa, ûrîa ûkaraga ambeteerete mwariine.

³⁵Nîkwîthîrwa ûrîa ûncwaga nî oonaga mwoyo, na MWATHANI nî amwigagîîrua kîaao.

³⁶Îndî ûrîa ûtîncwaga nî thîîna aireetagîîra; na ûrîa ûnthwîre nî gîkuû acwaga.”