Read KIMERU BIBLE PROTESTANT EDITION Njun 9 Bible Online

Njun 9 - KIMERU BIBLE PROTESTANT EDITION bible

Njun 9

¹Ûûme bûkari ta muntû wakîte nyomba[1] na amiigîka na itugî mûgwanja.

²Ningî nî athînjîte nyomoo nîûntû bwa kîatho, na aringania ndibei. Nî athuranîrîte meetha yaawe.

³Nî atûmîte nthûûmba ciaawe cia aarî nîkenda itûmîîria irî tûrîmeene kûu ntûûreene ikiugaga atîrî:

⁴“Njûûni aja buî antû babariitu.” Bareera barîa batî kîrîra atîrî,

⁵“Njûûni bûrîe biakûrîa, na bûnyue ndibei îrîa ndinganîtie.

⁶Tiganeni na mantû ja waa naabuî bûgatûûra mwoyo na bûtongagîîrue nî ûûme.”

⁷Ûkëeja gûkaania mûthûmbania ûntû gaakûruma, na ûkëeja gûtetia muntû ûmûthûûku no rworo agwîkîra.

⁸Ûkéeja gûkaania mwikumia ûntû këethîra ûtîkwenda akûthûûra. Îndî ûgäkaania muntû ûmûûme ûntû, agakwenda.

⁹Ûkäritana muntû ûmûûme ka eetaga na mbere kûûmîa, na ûkäritana muntû ûmwagîru, ka ûûme bwaawe bwongeerekaga.

¹⁰ Gûkîra MWATHANI nîkîo kîambîrîria kîa ûûme. Kûmenya Ûrîa Mûtheru nîku kûgîa ûmenyo.

¹¹Nîkwîthîrwa ûûni Ûûme, ngatûma mîaka yaaku yongeereke,

¹²Wëethîrwa ûrî ûmûûme, ûûme bwaaku bûgaagûteethia îndî wäbûmena, noogwe ûkaarîa thîîna.

¹³Mûka kîaa aringaga gîtuma gîkiingî, nawe nî ntûrîka na atî nthoni.

¹⁴Akaraga mwariine jwa nyomba yaawe, kana agakara antû arîa antû bakûmwona ntûûreene,

¹⁵agakara agîîtaga akûrûki na njîra barîa baciîtîrîte ngûgîîne ciaao.

¹⁶We akabeera atîrî, “Njûûni aja buî antû bariitu” na akeera barîa barî kîrîra atîrî,

¹⁷“Tûûjî twa kwia tûrî mûrîo, na biakûrîa bikûrîîrwa withoone birî mûrîo jûmûûî.”

¹⁸Îndî biaa bitîmenyaga atî barîa baaûkagîra kwa mûka ûu nîka bakuujaga, na bonthe barîa beetaga kwaawe nî gwa akuû barî.