Read KIMERU BIBLE PROTESTANT EDITION Mût 1 Bible Online

Mût 1 - KIMERU BIBLE PROTESTANT EDITION bible

Mût 1

¹Iji nî nteto cia Mûtûmîîria, ûrîa waathanaga arî Jerusalemu. We aarî mûtaana wa Daudi.

²Mûtûmîîria ariuga atîrî, Mantû jonthe nî ja ûtheri; nî ja ûtheri buru. Ûtûûro nî bwa ûtheri; na bionthe nî bia ûtheri.

³Nîmbi muntû oonaga kuumania na ngûgî cionthe irîa aritaga, irîa ainogagia nacio gûkû nthîgûrû?

⁴Nthukî îîjaga na îgakûrûka, îngî îkeeja na îgakûrûka, îndî nthîgûrû îtîgarûkaga.

⁵Riûa riumaga rûkîîrî na ûgoro rîkathûa, rîkamatûkanga naarîa riumagîîra rîkauma kaîrî.

⁶Ruuo ruurutanaga bwa ûmotho na rûkaurutana bwa ûrîo; rûkathiûrûka na rûkathiûrûka na rûkaurutana kaîrî.

⁷Ndûûjî cionthe ciîtaga îrieene, îndî îria rîtîûjûraga; o naarîa ndûûjî ciumagîîra, no nao ndûûjî iu ciumagîîra kaîrî.

⁸Mantû jonthe nî jatûmaga muntû anoga mono na gûtî muntû ûûmba kuuga nîkî gûkari ûu. Meetho jatîng'anagîrwa nî jarîa jooneete, kana matû jang'anîrwa nî jarîa jaigîtue.

⁹Bûrîa bwaarî o, nîo bu bûkeethîrwa bûrî o; bûrîa bwathithua, noobu bûkaathithua nyumeene. Gûtî ûntû bûbwerû gûkû nthîgûrû.

¹⁰Gûtî ûntû muntû oomba kuuga: “Tegeeni! Ûntû bûbû nî bûbwerû.” Nîkwîthîrwa bwîthîrîtwe bûrî o magiita jonthe kinya mbere ya tûciarwa.

¹¹O ta ûrîa mantû jarîa jakûrûkîte jatîririkanagwa nîo u kinya jarîa jakeeja nyumeene jatîtua kûririkanagwa nî barîa bakeeja nyumeene.

¹²Ni Mûtûmîîria, ntwîre Jerusalemu ndî mûnene wa Israeli.

¹³Naani nî ndaaugîre ngaatumîra mathûgaanio jaakwa mwanka menye mantû jonthe jarîa jathithagua nthîgûrû îîjî. Ndîroona atî ngûgî irîa Mûrungu aeete muntû nî indito mono.

¹⁴Nî ntegeete mantû jarîa jonthe jathithagua gûkû nthîgûrû ndoona atî jonthe nî ja ûtheri, na nî ta kwîngana na ruuo.

¹⁵Gîntû kîrîa gîkombokangi, gîtîumba gûkomborokua, kîrîa gîtî o, gîtîûmba gûtarwa.

¹⁶ Naani ndîraciîra atîrî, “Nî ngîîte ûûme bûbwingî, bûkûrûkîte bwa anene bonthe barîa baathana Jerusalemu mbere yaakwa. Nî nthirîtie kûmenya mantû jamanene jegiî ûûme na ûmenyo.”

¹⁷Nî ndeendere kûmenya mantû jegiî ûûme na nthû na waa. Ndîroona kinya kûthithia ûu nî ta kwîngana na ruuo.

¹⁸Nîkwîthîrwa ûûme bûbwingî, nîka bûthangîkagia muntû, na o ûrîa ûmenyo bwa mantû bûkwongeereka, nîo u mîthangîko yaawe yongeerekaga.