Read KIMERU BIBLE PROTESTANT EDITION Mût 10 Bible Online

Mût 10 - KIMERU BIBLE PROTESTANT EDITION bible

Mût 10

¹O ta ûrîa ngii îmwe îthûkagia cubu, nîu waa bûniini bûthûûkagia ûûme na îgweta rîa muntû.

²Muntû ûmûûme eendaga kûthithia mantû jameega, îndî kîaa kîendaga kûthithia mantû jamaaî.

³Mwîtîre jwa muntû ûmûriitu njîreene nî jûmwendagia, jûgatûmîîria ûriitu bwaawe kîrî bonthe barîa bamwonaga.

⁴Kinya mûtongeeria akëeja kûthûûra nîgwe atîa, ûkeerûkîra ngûgî yaaku. Kwombîka ûboreri bwaaku bûgatûma maatia jaaku kinya jëethîrwa janenei atîa jarekerwa.

⁵Nî mboneete ûntû bûngî bûbûthûûku nthîgûrûûne îîjî. Nabû nî maatia jathithagua nî atongeeria.

⁶Biaa bieejagwa itî bibinene ûtongeerieene, îndî itonga bieejagwa itî bitî na gîtûmi.

⁷Nîmboneete nkombo igwîtithia mbarathi, nabo atongeeria bagîîtaga na magûrû ta nkombo.

⁸ Ûrîa wînjaga îrinya oomba kûgwa ku wengwa; ûrîa ûkoboraga nthingo kenda atonyeera ku, oomba kûrûmwa nî njoka.

⁹Mwaji wa maiga oomba kûringwa nîjo, na mwatûri wa nkû oomba kûringwa nîcio.

¹⁰Gîchiû gîkëethîrwa gîtuui, muntû akarega gûkînoora, no mwanka atumîre inya înyiingî akîrita ngûgî nakîo. Nî kaaba ûûme nîûntû nî bûteethagia muntû.

¹¹Njoka îkëeja kûrûmana mbere ya kûaamua, gûtî gîtûmi gîa gûcwaa mwaamia wa njoka.

¹²Nteto irîa ciumaga kanyua ka muntû ûmûûme, nî itûmaga akeendwa, îndî nteto irîa ciumaga kanyua ga kîaa, ka imûrîîjaga.

¹³Kîaa kîambagîîria na kwaria waa, gîkathiria kwaria na mantû ja nthû akî.

¹⁴Kîaa kîaragia nteto inyiingî. Gûtî muntû ûûmba kûmenya ûrîa gûgaakarîka nyumeene, na gûtî we ûûmba kûmenya ûrîa gûgaakarîka nyuma ya aakua.

¹⁵Kîaa gîciûragaga na ngûgî mwanka gîkoorîrua nî njîra ya kwaana nayo.

¹⁶Wûi kîrî nthîgûrû îrîa yaathagwa nî muntû ûmwîthî, îrîa atongeeria barookagîra kûrîa biatho.

¹⁷Nî kaaba nthîgûrû îrîa yaathagwa nî mûnene ûûmbaga kwaathana na ûûme bwaawe wengwa, na atongeeria baaku barîîjaga biatho îgiita rîrîa rîagîrîte, nîkenda bagwata inya na tî ûntû bwa mbogita.

¹⁸Nyomba ya mûthao ka yuuraga ûthao bugatûma îgakoboka.

¹⁹Biakûrîa nî bitûmaga muntû agwîrua, ndibei nayo îgatûma acancamûka, îndî mbeecha nîcio itûmaga mantû jamaingî joombîka.

²⁰Ûkórothûgaanîria mûnene mantû jamathûûku, kana ûruma itonga kinya ûrî ûrûrî bwaaku; ûtîkëeje kwigîîgua nî kanyoni-muntû, keeja kûbaikîria nteto iu.