Read KIMERU BIBLE PROTESTANT EDITION Mût 2 Bible Online

Mût 2 - KIMERU BIBLE PROTESTANT EDITION bible

Mût 2

¹Ndîrauga atîrî, “Ka-ngerie kwigwîria kinya ku mbone.” Îndî kinya ku ndîroona nî kwa ûtheri.

²Ndîroona kinya ntheko nî cia waa, naku kwigwîria ndîraaga nî gwakî.

³O ntongeeretue nî ûûme bwaakwa, nî ndaacuîre kwigwîria na ndibei na ndîrageria mantû jangî jonthe jarîa muntû airîragîîria nîkenda menya nî ûntû bûrîkû muntû oomba kûthithia bûkamûgwîria matukûûne jamakai jarîa atûûraga gûkû nthîgûrû.

⁴ Ndîrathithia mantû jamanene; ndîraciakîra nyomba na ndîraanda mîzabibû.

⁵Ndîrathithia miuunda na biarago bia kûnogokaga, ndîraanda mituunda ya mîthemba yonthe ku.

⁶Ndîraithithîria biegû bia kûgwatagîria rûûjî rwa gwitûûragîria mîtî îîu.

⁷ Ndîragûra nkombo cia arûme na cia aka na nî ndaarî na kinya nkombo ingî irîa ciaciarîrîtwe nja yaakwa. Ningî nî ndaarî na ndîîthia inyiingî cia ng'ombe na mbûri na ng'ondu nkûrûki ya muntû wonthe ûrîa watûûra Jerusalemu mbere yaakwa.

⁸ Ningî nî ndaaciûthûranîîrie fetha na thaabu na into bibingî bia anene na bia nthîgûrû îrîa ndaathaga. Nî ndaarî na aini ba arûme na ba aka na aka ba gwîka babaingî o ûrîa nkoro ya muntû yendekia.

⁹ Nî ndaagîîre na îgweta rîrînene mono nkûrûki ya barîa bonthe beethîrwa barî Jerusalemu mbere yaakwa. Naani ntaataûkîrwa nî ûûme bwaakwa.

¹⁰Kîrîa kîonthe ndoonaga nkairîrîrîîria, ndaatigagîîra gîgûtuîka gîaakwa. Gûtî ûntû bwa kwigwîria ndatiga ntîthithîtie. Nî ndagwîragua nî jarîa jonthe ndaathithagia, na rîu nîrîo rîaarî îtuui rîaakwa kuumania na ngûgî irîa cionthe ndaarita.

¹¹Îndî nî ndaacokere ndîrathûgaania bwa ngûgî cionthe irîa ndaaritîte na mînoga îrîa ndaanogete nkiirita, ndîroona atî cionthe ciaarî cia ûtheri, na nî ta kwîngana na ruuo. Ndîroona gûtî ûntû bûrî gîtûmi gûkû nthîgûrû.

¹²Tontû bûû, nî ndeendere kûmenya kaîrî mantû jegiî ûûme na nthû na waa. Ndîraciûria, nî bûrîkû mûnene oomba kûthithia bûbwerû? Ndîroona atî jarîa jonthe athithagia no jarîa jaathithua nî mûnene ûngî mbere yaawe.

¹³Ndîratua atî ûûme nî bûbwega nkûrûki ya waa, o ta ûrîa weerû bûrî bûbwega nkûrûki ya muundu.

¹⁴Antû baboome nî boonaga mbere, îndî biaa bitûûraga bigîataataga muunduune. Îndî ûrîa mbijî nî atî mûthia jwaao bonthe no jûmwe.

¹⁵Ndîrauga atîrî, “Këethîra ûûni na kîaa tûkarigia ûmwe rî; ûûme bûbû bunthe mbîthîrîtwe ndî nabu nî bwaakî?” Ndîroona bûu kinya bu nî bwa ûtheri.

¹⁶Muntû ûrîa mûûme, o na kîaa, bonthe bagaakua, na gûtî we ûgaatûûra aririkanagwa. Matukû jatî thau jakathira, bonthe bakeethîrwa bakûûrîria.

¹⁷Nî ndaagîîre ûtûûro gîtûmi, nîûntû nî ndoonere atî jarîa jonthe jathithagua gûkû nthîgûrû nî ja thîîna, jonthe nî ja ûtheri na nî ta kwîngana na ruuo.

¹⁸Nî ndaagîre gîtûmi gîa into bionthe birîa biumenie na ngûgî îrîa ndaaritaga aja nthîgûrû, ndaamenya atî no mwanka mbitigîre muntû ûrîa ûgacoka antû aakwa.

¹⁹Ningî rî, nûû ûkûmenya këethîra akeethîrwa arî muntû ûmûûme kana kîaa? Amwe na ûu we nîwe ûkaa mwene wa into biu bionthe ncûîte na inya yaakwa na ûûme bwaakwa ndî gûkû nthîgûrû. Kinya bûu nabu ndîroona nî bwa ûtheri.

²⁰Tontû bûû, ndîracoka kwirira nîûntû bwa ngûgî irîa cionthe ndaaritîte nthîgûrûûne.

²¹Muntû no acwe into na ûûme bwaawe, na ûmenyo bwaawe, na ûtea bwaawe, îndî agacoka akabitiga bikarîîwa nî muntû ûtaabithangîkîra. Ndîroona ûntû bûu kinya bu bûtîbuui na bûrî bwa ûtheri.

²²Nîmbi muntû oonaga kuumania na mînoga yaawe yonthe îrîa ainogagia nayo arî gûkû nthîgûrû?

²³ Nîkwîthîrwa ûtûûro bwa muntû bûûjûri kîeba na ngûgî ciaawe nî cia mîthangîko, na kinya ûtukû muntû atînogokaga. Kinya bu nabu nî bwa ûtheri.

²⁴ Gûtî ûntû bûngî bûbwega kîrî muntû nkûrûki ya kûrîa na kûnyua na kûgwîrîrua rûûya rwaawe. Bûu nabu ndîroona buumaga kîrî Mûrungu.

²⁵Tontû rî, nûû ûûmba kûrîa kana kûgwîrua Mûrungu atîendeete?

²⁶ Mûrungu nî aejaga barîa bamûgwîragia ûûme na ûmenyo na kûgwîrua, nabo eeyia arekaga bagacwa into bakabiûthûrania, îndî akabinenkanîra kîrî barîa bamûgwîragia. Kinya bûu nî bwa ûtheri na nî ta kwîngana na ruuo.