Read KIMERU BIBLE PROTESTANT EDITION Mût 3 Bible Online

Mût 3 - KIMERU BIBLE PROTESTANT EDITION bible

Mût 3

¹Ûntû bunthe bûrî kingo kîaabu; ûntû bunthe bûrîa bûthithîkaga gûkû nthîgûrû bûthithîkaga o îgiita rîaabu.

²Kûrî îgiita rîa gûciarwa, na îgiita rîa gûkua; Kûrî îgiita rîa kwaanda, na îgiita rîa gûkûûra birîa biaandi.

³Kûrî îgiita rîa kûûraga, na îgiita rîa kworia; kûrî îgiita rîa kûtharia, na îgiita rîa gwaka.

⁴Kûrî îgiita rîa kûrîra, na îgiita rîa kûtheka; kûrî îgiita rîa kwithikîîra na îgiita rîa gûkûngwîra.

⁵Kûrî îgiita rîa kûthenganîîra, na îgiita rîtî rîa kûthenganîîra; kûrî îgiita rîa gûcûûncana, na îgiita rîa kûrega gûcûûncana.

⁶Kûrî îgiita rîa gûcwaa, na îgiita rîa gûta; kûrî îgiita rîa gwîka, na îgiita rîa kûrekeeria.

⁷Kûrî îgiita rîa gûtambûra, na îgiita rîa gûtuma. Kûrî îgiita rîa gûkira na îgiita rîa kwaria.

⁸Kûrî îgiita rîa kwendana, na îgiita rîa kûthûûrana; Kûrî îgiita rîa ndwaa, na îgiita rîa thîîrî.

⁹Nî umithio bûrîkû muntû oonaga kuumania na ngûgî irîa aritaga?

¹⁰Nî ndîîkîtie kûmenya mantû jarîa Mûrungu eendaga antû bathithagia.

¹¹Athithîtie mantû jonthe bûbwega, o ûntû na îgiita rîaabu. Nî eekîrîte muntû nyoonta ya kwenda kûmenya mantû jarîa jagaakarîka, îndî gûtî rîo muntû oomba kûmenya ûrîa Mûrungu akaathithia.

¹²Nî menyete atî gûtî ûntû muntû oomba kûthithia ûtûûroone bwaawe bûbwega nkûrûki ya kûgwîrua na gwikenia.

¹³Ningî nî ndamenyere atî muntû kwîthîrwa akîona biakûrîa na biakûnyua, na kinya agwîrîrua rûûya rwaawe, nî kîewa kuuma kîrî Mûrungu.

¹⁴Nî menyete atî bûrîa bunthe Mûrungu athithagia nî bûtûûraga kenya na kenya; na ningî gûtîkîo kîûmba kwoongeerwa kana kûritwa kîrî birîa Mûrungu athithîtie. Mûrungu athithîtie ûu, nîkenda tûmûkîraga.

¹⁵Mantû jarîa jagûkarîka nandî na jarîa jagaakarîka nyumeene, gûtî jo jatakarîka mbereene. Mûrungu nîwe ûtûmaga mantû jarîa jeethîrwa jarî o jakarîka kaîrî na kaîrî.

¹⁶Ningî nî ndoonere atî nthîgûrûûne, mantû jamathûûku jathithagua antû a mantû ja îota, na mantû jamaaî jakathithua antû a jarîa maagîru.

¹⁷Ndîracoka ndîrauga na nkoro atîrî, Mûrungu nîwe ûkaagiitîra barîa baagîru na barîa baaî îgamba. Nîkwîthîrwa we nî abangîte rîrîa o ûntû o ûntû bûgaakarîka.

¹⁸Ndaathûgaania mantû jegiî antû ndîroona atî Mûrungu abageragia kenda aboonia atî batî mwanya na nyomoo.

¹⁹Nîkwîthîrwa mûthia jwa muntû na jwa nyomoo no jûmwe; o ta ûrîa muntû akuujaga no ta u kinya nyomoo îkuujaga. Ûtûûro bwa muntû na nyomoo butî mwanya. Ûtûûro bwa muntû na bwa nyomoo nî bwa ûtheri. Gûtîkio muntû akûrûkîte nyomoo nakîo.

²⁰Antû beetaga gûntû kûmwe na nyomoo; antû baumaga mûthetuune ûmwe na nyomoo na bagacoka mûthetuune ûmwe na nyomoo.

²¹Nûû ûûmba kûmenya këethîra mwoyo jwa muntû jwitagia îgûrû na jwa nyomoo jûkeenama nthîgûrû?

²²Tontû bûû, nî menyete atî gûtî ûntû bûngî bûbwega bûkûrûkîte antû gûkenera ngûgî yaao, nîkwîthîrwa bûu nîbu agaîri. Nûû ûûmba kwîra muntû ûrîa gûgaakarîka nyuma ya aakua?