Read KIMERU BIBLE PROTESTANT EDITION Mût 4 Bible Online

Mût 4 - KIMERU BIBLE PROTESTANT EDITION bible

Mût 4

¹Ningî nî ndaacokere ndîroona ûrîa kwinyanîîria kûûjûri nthîgûrûûne. Ningî ndîroona ûrîa antû barîa baiinyîîrîtue bakûrîra batîkwona wa kûbateethia. Barîa baiinyanagîîria barî inya, nabo barîa baiinyagîîrua batî wa kûbateethia.

²Naani ndîrauga atî nî kaaba antû barîa bakuîte nkûrûki ya barîa barî mwoyo.

³Îndî kinya nkûrûki ya barîa bakuîte na barîa barî mwoyo, nî kaaba barîa bataaciarwa boona mantû jamathûûku jarîa jathithagua nthîgûrûûne îîjî.

⁴Ningî nî ndooneere atî mînoga yonthe îrîa antû bainogagia nayo bagîcwa gûkinyîra mantû jamanene yumanagia na kwenda kwing'anania na antû bangî. Bûu kinya bu ndîroona atî nî ûntû bwa ûtheri o ta kwîngana na ruuo.

⁵Muntû kîaa aregaga kûringithia ngûgî akairîîjithia thîîna akîonaga.

⁶Nî kaaba muntû kwîthîrwa arî na bibikai îndî anogoki nkoro nkûrûki ya kwîthîrwa arî na bibingî na atîkûnogoka, nîûntû kûu no ta kwîngana na ruuo.

⁷Nî mboneete ûntû bûngî bwa ûtheri nthîgûrûûne îîjî.

⁸Nabu nî kwona muntû ûtûûraga arî wenka akî, atî mwana kana muntû waao, îndî we aritaga ngûgî atîkûnogoka, na gûtî rîo augaga bikûng'ana. Ningî gûtî rîo we aciûragia atîrî, “Nûû nkûritîra ngûgî îîjî yonthe mwanka nkaaga îgiita rîa kwigwîria?” Bûu kinya bu nî ûntû bwa ûtheri na bûtîûmba gûtûma muntû ang'anîrwa.

⁹Nî kaaba antû baîrî nkûrûki ya muntû ûmwe. Ngûgî ya antû baîrî îrî umithio nkûrûki ya ngûgî ya muntû ûmwe.

¹⁰Antû barî baîrî, ûmwe akëeja kûgwa, ûu ûngî no amûkîîrie. Îndî nî bûbûthûûku muntû kwîthîrwa arî wenka nîûntû akëeja kûgwa, atîona wa kûmûûkîîria.

¹¹Ningî rî, antû baîrî bakamama amwe, nî baruutanagîîria, îndî muntû arî wenka, oomba kûruutîîrua nîmbi?

¹²Muntû oomba kûûra muntû ûmwe îndî antû baîrî no bamûûmîîrie. Mûkanda jwîîndi na mîrigi îthatû jûrî inya kûgiita.

¹³Nî kaaba mûthaka ûtî gantû îndî ûûmîi, nkûrûki ya kîaa kîa mûnene gîgîkûrû gîtîkwigua ûrîa gîkwîrwa.

¹⁴Kwombîka mûthaka ta ûu akeethîrwa aciarîri ûkîeene nthîgûrû îîu, îndî akauma ncheera na agatuîka mûnene.

¹⁵Nî ndaathûgaanîrie bwa antû bonthe barîa batûûraga nthîgûrû îîjî, ndîramenya atî kaana karîa gakaajûkia ûnene nyumeene karî o gatîgatîîne kaao.

¹⁶Antû barîa mûnene aathaga kinya bakeethîrwa baingîi ûntû batîgûtarîka, rîrîa auma o, gûtî we ûcokaga kûririkana wega bwaawe kaîrî. Nî mma bûu kinya bu nî ûntû bwa ûtheri, na no ta kwîngana na ruuo.