Read KIMERU BIBLE PROTESTANT EDITION Mût 5 Bible Online

Mût 5 - KIMERU BIBLE PROTESTANT EDITION bible

Mût 5

¹Menyagîîra ûgîîta nyomba ya Mûrungu. Nî kaaba gwîta ku kûthikîîra ûritani nkûrûki ya gwîta ku kûrita igongwana bia rûûo, ta ûrîa antû bamwe bathithagia batîkûmenya këethîra nî ûthûûku bakûthithia.

²Ûkáagîta mpwîî-mpwîî cia kwaria, kana ûciîtîria Mûrungu ûtîambîte kûthûgaania bwega. Nîkwîthîrwa Mûrungu nî îgûrû arî, naagwe nî nthîgûrû ûrî; tontû bûu thimîra rwaria rwaaku.

³Nîkwîthîrwa kwithîînia na mathûgaanio jamaingî nî kûreetaga irooto bibithûûku; na kwaria gûkwingî naku gûkoonania waa bwa muntû.

⁴ Weeja gûciîtîria Mûrungu ûntû, menyeera ûûjûrie mûciîtio jwaaku na mpwîî. Nîkwîthîrwa Mûrungu atîendaga rûûo. Ûjûragia mûciîtio jwaaku.

⁵Nî kaaba gûkara ûtîciîtîtie antû a ûciîtia na ûrega kûûjûria mûciîtio jûu.

⁶Menya wîja kûreka kanyua gaaku gagûtonyia wîyieene, rîu ûcokaga kwîra nthûûmba ya Mûrungu atî jararî maatia. Gûtî gîtûmi gîa kûthûûria Mûrungu na rwaria rwaaku eeja kwînyangia into biaaku.

⁷Nîkwîthîrwa irooto bibingî na nteto inyiingî nî bia ûtheri; kaaba gûkîra Mûrungu.

⁸Ûkaarigara woona nkîa îkîinyîîrua na îtîkûthithîrua ûrîa kwagîrîte nthîgûrûûne, nîkwîthîrwa bau bakûmîinyîîria bakarîtue nî anene, nabo anene bau bakarîtue nî anene baao.

⁹Nthîgûrû nî yonagîra bau bonthe gantû o na kinya mûnene.

¹⁰Muntû ûrîa wendeete mbeecha mono, gûtî rîo oomba kûng'anîrwa nîcio; na muntû ûrîa wendeete ûtonga mono, gûtî rîo ang'anagîrwa nî birîa oonaga. Bûu kinya bu nî bwa ûtheri.

¹¹O ûrîa into bikwongeereka, noou arîîi baabio boongeerekaga. Tontû bûû, mwene bio gûtî kûgunîka agunîkaga nîbio, tiga kûbiona abionaga na meetho akî.

¹²Mûriti wa ngûgî eethîrwa nî anyiri kana atînyiri nî amamaga gatoro gakeega; îndî gîtonga gîtîonaga toro nîûntû bwa into biaakîo bibingî.

¹³Kûrî ûthûûku bûbûnene mboneete nthîgûrû îîjî: nabu nî ûtonga muntû acwîte bûgîcoka kûmûgarûka.

¹⁴Ûtonga ta bûu bwoomba kûûrîra ngûgîîne îtî na umithio, nawe eethîrwa arî na mwana akaaga gantû ga kûmûtigîra.

¹⁵ O ta ûrîa muntû aciaragwa akeeja nthîgûrû arî ûtheri, noou aumaga nthîgûrû arî ûtheri, na gûtî kîa birîa athithinîrîte akamataga eeta nakîo.

¹⁶Bûbû kinya bu nî ûntû bûbûthûûku mono; kwîthîrwa atî o ûrîa muntû eejaga nthîgûrûûne akari, nîo u aumaga ku akari. Nîmbi muntû oonaga nîûntû bwa gûtûûra aritaga ngûgî cia ûtheri,

¹⁷na gûtûûra ûtûûro bwaawe bunthe arî muunduune, na arî na kîeba, na mîruuru ya nkoro, na mbajua, na kûrega kûng'anîrwa?

¹⁸Atîrî, ûntû bûrîa mboneete bûrî bûbwega na bwagîrîte kîrî muntû nî kûrîa na kûnyua. Ningî kûgwîrîrua birîa bionthe ooneete kuumania na rûûya rwaawe matukû jamakai jarîa Mûrungu amweete ja gûtûûra gûkû nthîgûrû. Nîkwîthîrwa bûu nîbu muntû agaîri nî Mûrungu.

¹⁹Îndî ûkëeja kwona muntû Mûrungu aeete ûtonga na into bibingî na amûteethia kûbigwîrîrua na kûng'anîrwa nî birîa agaîri, na birîa athithinîrîte - kîu nî kîewa kuuma kîrî Mûrungu.

²⁰Muntû ta ûu atîtindaga amakîte nî mantû ja ûtûûro bwaawe nîûntû Mûrungu eethagîrwa oojûrîtie nkoro yaawe gîkeno magiita jonthe.