Read KIMERU BIBLE PROTESTANT EDITION Mût 6 Bible Online

Mût 6 - KIMERU BIBLE PROTESTANT EDITION bible

Mût 6

¹Kûrî ûthûûku mboneete gûkû nthîgûrûûne; nabu nî ûntû bwa kûrigarania mono.

²Nabu nî atî, Mûrungu oomba kwaa muntû ûtonga na into bibingî na îgweta, mwanka muntû akeethîrwa atîagîte gîntû noo kîmwe kîa birîa eendaga, îndî antû a Mûrungu areka abigwîrîrua, muntû ûngî akabigwîrîrua. Bûu nî ûntû bwa ûtheri na nî kûthangîkia muntû ûtheri.

³Muntû oomba kwîthîrwa arî na aana îgana rîmwe, na ningî agatûûra îgiita rîrîraaja mono. Îndî muntû ta ûu akëethîrwa gûtî kûgwîrua akoona ûtûûroone bwaawe bunthe, kana oona wa kûmûthika aakua, nî kaaba kaana karîa gaciaragwa gakuîte nkûrûki ya muntû ta ûu.

⁴Tontû gûciarwa gwa kaana ta kau nî kwa ûtheri; nako gacokaga muunduune riîtwa rîaako rîkoorîria buru.

⁵Ningî kaana ta kau gatîîthagîrwa kooneete riûa kana kamenya ûntû noo bûrîkû, îndî ko nî koonaga kînogoko kîrîa muntû ta ûu atîonaga.

⁶Tontû kinya muntû ta ûu agatûûra mîaka ngiri ijîîrî atina kûgwîrua ûtûûroone, anga bobaîrî tî gûntû kûmwe beetaga?

⁷Muntû aritaga ngûgî irîa cionthe aritaga nîûntû bwa kîu kîaawe, îndî gûtî rîo auga akûng'ania.

⁸Nîmbi muntû ûmûûme akûrûkîte nayo kîaa? A nkîa yo nîmbi yonaga kinya yëethîrwa îrî na mîkarîre îmîega mbere ya antû bangî?

⁹Kaaba gîntû weene na meetho nkûrûki ya kîrîa ûkwirîrîîria ûtîene. Bûu kinya bu nî ûntû bwa ûtheri na nî ta kwîngana na ruuo.

¹⁰Ûntû bûrîa bunthe bûrî o, no bwaarî o kuuma tene. Muntû nî aijîkeene ûrîa akari, na nî kwijîkeene atî atîûmba gûciindana na ûrîa ûrî inya nkûrûki yaawe.

¹¹Kwaria gûkwingî nî kwa ûtheri na gûtî u kûgunaga muntû.

¹²Nûû ûûmba kûmenya kîrîa kîagîîrîte muntû ûtûûroone bûrîa atûûraga bûbûkuî na bwa ûtheri, bûrîa bûkûrûkangaga ta îtu? Nûû ûûmba kwîra muntû ûrîa gûgaakarîka aja nthîgûrû nyuma ya aakua?