Read KIMERU BIBLE PROTESTANT EDITION Mût 8 Bible Online

Mût 8 - KIMERU BIBLE PROTESTANT EDITION bible

Mût 8

¹Nî muntû ûrîkû ûkari ta muntû ûmûûme ûrîa ûûmba gûciûra mantû? Ûûme bûtûmaga ûthiu bwa muntû bûkengakenga na bwîthîrwa bûtî mîkûnjo.

²Athîkagîra waatho bwa mûnene. Menya wîja gûciîtia kûthithîria Mûrungu ûntû ûtîambîte kûthûgaania bwega.

³Ûköona mûnene arî na ûntû bûtî bûbwega mwebere, nîûntû gûtî u mûnene eenda kûthithia atîthithie.

⁴Mûnene auga ûntû, nî augîre. Gûtî we ûûmba kûmûûria, “Nîatîa ûkûthithia?”

⁵Muntû ûrîa wathîkagîra waatho bwa mûnene atîonaga ûthûûku. Muntû ûmûûme nî aijî kûthithia mantû jarîa jaagîrîte îgiita rîrîa rîagîrîte.

⁶Ûntû bunthe bûrî rîrîa bûbuîrîte kûthithua, na njîra îrîa bûbuîrîte kûthithua nayo, kinya kéethîra muntû atûûraga aritwîri nî mûrigo jwa thîîna.

⁷Muntû atîûmba kûmenya mantû jarîa jagaakarîka nyumeene, na gûtî we ûûmba kûmwîra.

⁸Muntû atîûmba kûrigîîria ruuo kana oomba kûrigîîria gîkuû ntukû yakinya. O ta ûrîa gûtî asikarî weejagwa rûûtha îgiita rîa ndwaa, nîo u barîa athûûku batîrekagwa nî ûthûûku bwaao.

⁹Ndaamenyere mantû jau jonthe nkîthûgaanîria mantû jarîa jonthe jathithagua gûkû nthîgûrû, kûrîa antû bamwe baathaga bangî bakîbaiinyagîîria.

¹⁰Ningî nî mboneete ûrîa antû barîa bathûûku bagûkumua mathikoone jaao bakîîragwa bataatîîraga kîûrûûne kîa Mûrungu, mwanka mantû jamathûûku jarîa baathithagia jakoorîria. Bûbû kinya bu nî bwa ûtheri.

¹¹Antû beetaga na mbere kûthithia ûthûûku nîûntû barîa bathithagia ûthûûku batîkanûkagua o rîrîa baathithia ûthûûku.

¹²Kinya kwëethîrwa muntû ûmûûî nî atûûraga akîthithagia ûthûûku magiita jamaingî, ningî nî atûûraga îgiita rîrîraaja, nî mbijî na mma atî barîa bakîraga Mûrungu nî bakaraga bwega.

¹³Îndî barîa bathûûku batîkaraga bwega, bakari ta kîrundû na batîtûûraga ûtûûro bûbûraja nîûntû bo batîkîraga Mûrungu.

¹⁴Kûrî ûntû bwa ûtheri bûthithîkaga nthîgûrûûne. Nabu nî rîrîa antû babaagîru bakûthithîrua ûrîa antû babathûûku babuîrîte kûthithîrua, nabo antû babathûûku bakathithîrua ûrîa antû babaagîru babuîrîte kûthithîrua. Ûntû bûu kinya bu ndiuga nî bwa ûtheri.

¹⁵Ndiuga nî kaaba kûgwîragua. Nîkwîthîrwa gûtî ûntû bûngî muntû oomba kûthithia gûkû nthîgûrûûne nkûrûki ya kûrîa na kûnyua na kwigwîrîrua. Tontû akethagîrwa agwîrîîtue akîrita ngûgî ciaawe îgiita rîrîa Mûrungu amweete rîa gûtûûra gûkû nthîgûrû.

¹⁶Nî ndeendere kûgîa ûûme, na kûmenya ngûgî irîa antû baritaga nthîgûrûûne, ndîramenya atî batîmamaga ûtukû na mûthenya.

¹⁷Ningî nî ndoonere atî gûtî muntû ûûmba kûmenya mantû jarîa jonthe Mûrungu athithagia gûkû nthîgûrûûne. Kinya muntû akainogia atîa, akîgeria kûjamenya atîûmba kûjamenya. Kinya muntû ûmûûme akauga nî aijî, atîûmba kûmenya.