Read KIMERU BIBLE PROTESTANT EDITION Mût 9 Bible Online

Mût 9 - KIMERU BIBLE PROTESTANT EDITION bible

Mût 9

¹Nî ndaathûgaanîrie mono bwa mantû jau jonthe, ûrîa Mûrungu atongagîîria mathithio ja antû baboome na babaagîru. Gûtî muntû wiijî këethîra gaakeendwa kana gaakathûûrwa nyumeene. Gûtî we wiijî bûrîa bûkeeja nyumeene.

²Mûthia jwa antû bonthe no jûmwe, na barî babaagîru kana barî eeyia, na barî babeega kana babathûûku, na barî babatheru kana batîtheri, na barîa baritaga igongwana kana barîa batîritaga igongwana. Mûthia jwa muntû ûmwega nîo ju jwa mwîyia. Mûthia jwa ûrîa ûciîtagia nîo ju jwa ûrîa ûtîciîtagia.

³Bûbû nî ûntû bûbûthûûku bûkarîkaga gûkû nthîgûrûûne; atî mûthia jwa antû bonthe nî jûmwe. Ningî nkûrûki, rîrîa antû barî mwoyo, nkoro ciaao ciîthagîrwa ciûjûri mantû jamathûûku na ja nthû, na mûthieene nîka bakuujaga.

⁴Îndî kaaba muntû ûrî mwoyo nîûntû arî wîrîgîîro. Ningî nî kaaba kurû îrî mwoyo nkûrûki ya ngatûnyi înkuû.

⁵Barîa barî mwoyo nî baijî atî bo bagaakua. Îndî barîa bakuîte gûtî ûntû bamenyaga. Gûtî mpongeeri boonaga nîûntû nî boorîrîîtie buru.

⁶Antû baakua, kinya kwendana kwaao, na kûthûûrana kwaao kana kwiganîîrua rûriitho kwaao, bikuujanagîria amwe nabo. Ningî gûtî ûntû noo bûmwe bwa jarîa jathithagua gûkû nthîgûrûûne bacokaga kwîthîrwa barî na bata nabu kaîrî.

⁷Rîa irio biaaku ûbigwîrîrue na ûnyue ndibei yaaku ûcancamûke, nîûntû Mûrungu nî eetîkîîrîtie ûthithia mantû jau.

⁸Îkagîra nguû inthongi na wakage maguta. Nabio bikoonanagia nî ûgwîrîîtue.

⁹Gwîragîrua ûtûûro na mwekûrû waaku nîûntû nî ûmwendeete. Bûgwîrague matukû jonthe ja ûtheri ja jarîa Mûrungu abweete gûkû nthîgûrû. Nîkwîthîrwa bûu nîbu bûgaîri ûtûûroone na nîbu bûtûmaga bwithangîkia na ngûgî.

¹⁰Rîrîa ûrî na ngûgî ya kûrîta mîritage na inya yaaku yonthe; nîûntû weeta gwa akuû gûtîîthîrwa kûrî na ngûgî cia kûrita kana kûthinyaara, kana gûcwaa ûmenyo, kana ûûme.

¹¹Ningî nî mboneete atî gûkû nthîgûrû, barîa boogîaga mono tî bo baciindaga rwîroone, na barîa barî inya tî bo baciindaga ndweene. Muntû ûmûûme tîwe woonaga biakûrîa, na muntû ûmûciûku tîwe wonaga ûtonga. Ningî barîa barî ûtea batîendagîîrwa. Îndî bonthe barî îgiita rîa kwona wega kana ûûî.

¹²Muntû atîmenyaga rîrîa îgiita rîaawe rîgakinya. O ta ûrîa makûyû jagwatagua na neeti, kana o ta ûrîa nyoni igwatagua na gîtegi, no ta u muntû akirimanagua nî mantû, agatonya ûthûûkuune atîkûmenya.

¹³Ningî nî ndoonere ngerekano înjega mono ya kwoonania ûrîa ûûme bûkari gûkû nthîgûrûûne. Nayo nîyo îîjî:

¹⁴Nî kwaarî na gatûûra kaarî na antû babakai. Mûnene ûmwe waarî na inya mono nî eetîre kwithûkîra gatûûra kau. Baragacîgîîria na kûûmbaûmbania mîtaro gûkathiûrûkîra kûrigîîria batîkarathwe.

¹⁵Îndî gatûûreene kau nî kwaarî na nkîa îmwe yaarî na ûûme. Nayo nî yoonokerie gatûûra kau na ûûme bwaayo. Îndî nyuma ya ûu gûtî muntû waacoka kûmîririkana kaîrî.

¹⁶Naani ndîramenya atî ûûme nî bûkûrûkîte inya, kinya këethîra kîrîra kîrîa nkîa yeejanaga nî kîmenagwa na nteto cia nkîa itîthikagîîrwa.

¹⁷Nî kaaba nteto cia muntû ûûmûûme ciarîîtue na kîoe, nkûrûki ya nteto cia mûnene kîaa irîa arîrîîtie biaa na kajû.

¹⁸Nî kaaba ûûme nkûrûki ya mathaga ja ndwaa, îndî mwîyia ka athûûkagia mawega jonthe.