Read KIMERU BIBLE PROTESTANT EDITION Rwî 2 Bible Online

Rwî 2 - KIMERU BIBLE PROTESTANT EDITION bible

Rwî 2

¹Ni nkari ta îûa rîa bûûrî ya Sharoni, kana rîa mûgwanthî jwa irîma.

²Mûnyaanya waakwa akari ta îûa, rîri gatîgatî ka miigua. Nîu mûnyaanya waakwa akari arî gatîgatî ka aarî.

³O ta ûrîa mûembe jûkaraga gatîgatî ka mîtî ya mwitû nîu mûnyaanya waakwa akari arî kîrî arûme bangî. Nî mpendeete mono gûkara mûgunyeene jwaaju, matuunda jaaju jarî mûrîo.

⁴We nî aambikîrie nyomba îrî na kîatho arambonia wendo bûbwingî.

⁵Nderaga na ûmbîkagîre inya na nzabibû injûmo ûnyoontorage na matuunda ja apû, nîûntû nîka nkûgirîka nî wendo.

⁶Njara yaawe ya ûmotho îmamagîrwa nî kîongo gîaakwa nayo njara yaawe ya ûrîo îgantongatonga!

⁷Ndabwerenca buî aarî ba Jerusalemu, bûciîtie na nthia kana nthûriga atî bûtiumbuthûra wendo kana bûbûkaûkia, bûtîrakinyia îgiita rîrîa rîagîrîte.

⁸Nî nkwigua kajû ka mûnyaanya waakwa! Tûu mûtege nî eejîte, akîthûngathûngûthaga irîmeene, na tûrîmeene

⁹Mûnyaanya waakwa akari ta nthia kana nkûrûngû. Tûûrîa, mûtegeeni arîa arûngi, nyuma ya rûthingo rweetû we nî ategereete ndiricheene.

¹⁰Mûnyaanya waakwa nî ambaragîria. Akambîîra nteto iji: “Njû gwe mûnyaanya waakwa, ûrî ûmûthongi mono njû twîte.

¹¹Îgiita rîa mpio nî rîkûrûkîte; ngai nî îtigîte kuura.

¹²Nthîgûrû nî yûjûri maûa na îgiita rîa kwina rîgûkinya. Kinya nkûngûthikû nî îkwigîîgua îkiina nthîgûrûûne yeetû.

¹³Mîkûû nî îciarîte nkûû mîzabibû nî îriibîte na îrî na yeera rîrîega. Njû gwe mûnyaanya waakwa, ûrî ûmûthongi mono njû twîte.

¹⁴Mûnyaanya waakwa, gwe ûkari ta kîjea kîrîa giiciithaga mbatûkeene cia maiga nteere cia ndwara cia maiga. Reka mbone ûthiû bwaaku na mbigue kajû gaaku na ûthiû bwaaku nî bûbûthongi. Tontû kajû gaaku nî gakeega.

¹⁵Tûgwatîrie mbîrwa na twanaana twaacio nîkenda itîkeenyangie muunda jwa nzabibû, nîûntû mîzabibû nî îraîîte.”

¹⁶Mûnyaanya waakwa nî waakwa, naani ndî waawe, we arîthagia ndîîthia ciaawe maûeene ja bûûrî,

¹⁷mwanka gûgakea rûkîîrî. Coka kîrî ni mûnyaanya waakwa, wîje ûgîtûûatûûaga irîmeene ta kathia kana kîanaana gîa nkûrûngû.